މިދިޔަ ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިޚާބުން ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމް ނާކާމިޔާބުވެވަޑައިގެންނެވީ ދިވެހި ރައްޔިތުންނަށް އަނިޔާވެރިވުމުން ކަމަށް ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު މުހައްމަދު މުސްތަފާ ވިދާޅުވެއްޖެ އެވެ.
މުސްތަފާ މިހެން ވިދާޅުވީ މިއަދު ކުރެއްވި ޓްވީޓެއްގަ އެވެ.
RYameen ah Inthihaabu Naakaamiyaabu vee Madam Fathun ge sababun neh noon. Naakaamiyaabu vee RY Aniyaaveri kan kuriyah nere dhivehi dhaulathakee Tharika mudhaleh kamah balaagen, libun ehcheh libunee ves Madam ge sababun.
— Mohamed Musthafa (@Thimarafushi) October 18, 2018
އެ ޓްވީޓްގައި މުސްތަފާ ވިދާޅުވެފައި ވަނީ ރައީސް ޔާމީން އަށް އިންތިޚާބު ނާކާމިޔާބުވީ މެޑަމް ފާތިމަތު އިބްރާހިމްގެ ސަބަބުން ނޫން ކަމަށެވެ.
އެމަނިކުފާނު ނާކާމިޔާބުވެވަޑައިގެންނެވީ އަނިޔާވެރިކަން ކުރިއަށް ނެރެ، ދިވެހި ދައުލަތަކީ ތަރިކަ މުދަލެއް ކަމަށް ބަލައިގެން އުޅުއްވުމުން ކަމަށް މުސްތަފާ ވިދާޅުވި އެވެ.
"ލިބުނު އެއްވެސް ލިބުނީ ވެސް މެޑަމްގެ ސަބަބުން"، މުސްތަފާގެ ޓްވީޓްގައި ވިދާޅުވެފައި ވެއެވެ.
އިންތިޚާބުގައި 41.6% ގެ މައިނޯރިޓީ އަކާއެކު ނާކާމިޔާބުވެވަޑައިގެންނެވި ރައީސް ޔާމީން ވަނީ އިންތިޚާބު ބާތިލްކުރުމަށް ސުޕްރީމް ކޯޓަށް ދުސްތޫރީ މައްސަލައެއް ހުށަހަޅާފައެވެ. އެ މައްސަލައިގެ އަޑުއެހުންތައް މިހާރު ނިންމާލާފައި ވާއިރު، އަންނަ އާދިއްތަ އެ މައްސަލައިގެ ޙުކުމް އިއްވާނެ އެވެ.