އިންތިޚާބީ ރައީސް، އިބްރާހިމް މުހައްމަދު ސޯލިހު (އިބޫ)، ކުރީގެ ރައީސް މައުމޫން އަބްދުލް ޤައްޔޫމް އާއި ބައްދަލުކުރައްވައިފި އެވެ.
މިކަން ހާމަކޮށްފައި ވަނީ ރައީސް މައުމޫން މިއަދު ކުރެއްވި ޓްވީޓެއްގަ އެވެ.
I felt honoured by the visit of President-elect Hon @ibusolih today. We discussed our current situation and hopes for the future. pic.twitter.com/95TDqbCWPC
— Maumoon Abdul Gayoom (@maumoonagayoom) October 22, 2018
އެ ޓްވީޓްގައި މައުމޫން ވިދާޅުވެފައި ވަނީ އެމަނިކުފާނުގެ އަރިހަށް އިބޫ ޒިޔާރަތްކުރެއްވުމަކީ ލިބިވަޑައިގެންނެވި ޝަރަފެއް ކަމަށެވެ. އަދި އެ ބައްދަލުވުމުގައި ދެ ބޭފުޅުންގެ މިހާރުގެ ޙާލަތާއި ބެހޭގޮތުންނާއި މުސްތަޤުބަލަށް ކުރާ އުންމީދުތަކާއި ބެހޭގޮތުން މަޝްވަރާކުރެއްވި ކަމަށްވެސް އެ ޓްވީޓްގައި މައުމޫން ވިދާޅުވެފައި ވެއެވެ.
މި ބައްދަލުވުމާއި ބެހޭ އިތުރު އެއްވެސް ތަފްސީލެއް އެއްވެސް ފަރާތަކުން ހާމަކުރައްވާފައެއް ނުވެއެވެ.
މައުމޫން އާއި އިބޫ ވަނީ މި މަހުގެ ކުރީކޮޅު ވެސް ބައްދަލުކުރައްވާފައެވެ.
އަދުލު އިންސާފު ޤާއިމްކުރުމަށް ހުރަސް އެޅުއްވި ކަމުގެ ދައުވާ އުފުލައި، ކުށް ސާބިތުވެ 1 އަހަރާއި 7 މަހާއި 6 ދުވަހުގެ ޖަލު ހުކުމެއް ތަންފީޒުކުރައްވަމުން ގެންދަވަނިކޮށް ކަފާލާތުގެ ދަށުން މައުމޫން މިނިވަން ކޮށްފައިވަނީ ސެޕްޓެމްބަރު މަހުގެ 30 ވަނަ ދުވަހު އެވެ. މައުމޫން ދޫކޮށްލާފައިވަނީ 60،000 ރުފިޔާ ބެހެއްޓުމަށް ފަހުއެވެ.