ކުރީގެ ޑިފެންސް މިނިސްޓަރ ކާނަލް މުހައްމަދު ނާޒިމްގެ މައްޗަށް އިއްވާފައިވާ ޖަލު ހުކުމް ތަންފީޒު ކުރުން ފަސްކުރަން ސުޕްރީމް ކޯޓުން މިއަދު އަމުރުކުރުމާއި ގުޅިގެން، ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު، ނާޒިމް އަށް މަރުޙަބާ ދަންނަވައިފި އެވެ.
ކާނަލް ނާޒިމް އަށް އަމީތު ވަރަށް ހޫނު މަރުޙަބާއެއް ދަންނަވާ މިއަދު ކުރެއްވި ޓްވީޓެއްގައި އަމީތު ވިދާޅުވެފައި ވަނީ ޙައްޤުގެ މަގަށް ނަޞްރު ލިބި، ނުޙައްޤު ޖަލު ބަންދުން ސަލާމަތްވެވަޑައިގަތުމަކީ ލިބިގެންދިޔަ ވަރަށް ބޮޑު އުފަލެއް ކަމަށެވެ.
Very warm #Congratulations to Colonel @nazim7878.
Hagguge magah nasru libi, nuhaggu jalu bandhun salaamayy ve vadaigathumakee libigen dhiya varah bodu ufaleh. #Alhamdulillah
— Mohamed Ameeth (@MohamedAmeeth) November 4, 2018
ކާނަލް ނާޒިމްގެ ޖަލު ޙުކުމް ތަންފީޒްކުރުން ފަސްކުރަން ސުޕްރީމް ކޯޓުން މިއަދު ޙުކުމްކުރިއިރު، އޭނާގެ މައްޗަށް ހަނގުރާމަވެރި ހަތިޔާރު ގެންގުޅުނު ކަމުގެ ކުށް ސާބިތުވެފައިވަނީ އޭނާ ދިރިއުޅުއްވި ކޮޓަރިން ފިސްތޯލެއް ފެނުނު މައްސަލާގައެވެ. އެކުށް ސާބިތުވެ 11 އަހަރުގެ ޖަލު ހުކުމެއް ނާޒިމް އަށް ވަނީ އިއްވާފައެވެ.
ނާޒިމް މިވަގުތު ހުންނެވީ ބޭސް ފަރުވާއަކަށް މެލޭޝިއާގައެވެ. ނާޒިމް އަކީ 1 ފެބްރުއަރީގައި ސްޕްރީމް ކޯޓުން ނެރުނު އަމުރުގައި މިނިވަން ކުރުމަށް ހުކުމް ކުރި އެއް ފަރާތެވެ.