ދިވެހިރާއްޖެއިން އިންޑިއާ އަށް ކަނޑައަޅުއްވާފައި ހުންނެވި ސަފީރު، އަހްމަދު މުހައްމަދު މަޤާމުން އިސްތިއުފާދެއްވައިފި އެވެ.
އަހްމަދު ވަނީ މި ޚަބަރު އޭނާގެ ރަސްމީ ޓްވިޓާ އެކައުންޓް މެދުވެރިކޮށް އިއުލާންކޮށްފަ އެވެ.
It was an honour to have served as Ambassador of #Maldives 🇲🇻 to #India 🇮🇳 for the past 3 years & 9 months. I will be completing my term of office on 16 Nov 2018 and officially relinquishing my duties as Ambassador. I plan to be back in the #Maldives soon. @MDVForeign @MEAIndia
— Ahmed Mohamed (AM) (@ahmedMDV) November 16, 2018
މިއަދު ކުރެއްވި ޓްވީޓެއްގައި އަހްމަދު ވިދާޅުވެފައި ވަނީ ފާއިތުވި 3 އަހަރާއި 9 މަސް ދުވަހު ރާއްޖެއިން އިންޑިއާއަށް ކަނޑައަޅުއްވާ ސަފީރުގެ މަޤާމު އަދާކުރެއްވުމަކީ ލިބިވަޑައިގެންނެވި ފަޚުރެއް ކަމަށެވެ. އަދި ސަފީރުކަމުގެ ދައުރު ނިންމަވާ، ސަފީރުކަމުގެ މަޤާމުން ރަސްމީކޮށް މިއަދު އިސްތިއުފާދެއްވާނެ ކަމަށްވެސް އޭނާ ވިދާޅުވި އެވެ.
މީގެ އިތުރުން ވަރަށް އަވަހަށް އެނބުރި ރާއްޖެ ވަޑައިގަންނަވާނެ ކަމަށްވެސް އަހްމަދު ވަނީ ވިދާޅުވެފަ އެވެ.
އަހްމަދު މުހައްމަދު އަކީ ޑީއާރްޕީގެ އިސް މަޤާމްތަކެއް ފުރުއްވުމުގެ އިތުރުން ކުރިން ވަޒީރުކަން ވެސް ކުރެއްވި ބޭފުޅެކެވެ.
އަހްމަދު މިއަދު ސަފީރުކަމުގެ މަޤާމުން އިސްތިއުފާދެއްވިއިރު، ރާއްޖެއިން މެލޭޝިއާ އަށް ކަނޑައަޅުއްވާފައި ހުންނެވި ސަފީރު މުހައްމަދު ފަޔާޒް (އެފްއޭ) ވެސް ވަނީ އިސްތިއުފާދެއްވާފަ އެވެ. މި ދެ ބޭފުޅުންގެ އިތުރުން ވެސް ސަރުކާރުގެ އިސް މަޤާމްތައް ފުރުއްވަމުން ގެންދެވި ގިނަ ފަރާތްތަކުން ވަނީ މަޤާމުން އިސްތިއުފާދެއްވާފަ އެވެ.