ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ ވެރިކަމުގައި އެމަނިކުފާނު ހިންގަވާފައިވާ ކޮރަޕްޝަންގެ މައްސަލަތައް ވީހާވެސް އަވަހަކަށް ތަހުޤީޤުކުރަން ޖެހޭ ކަމަށް އެމްޑީޕީގެ ޗެއާޕާސަން ހަސަން ލަތީފް ވިދާޅުވެއްޖެ އެވެ.
ހަސަން މިހެން ވިދާޅުވެފައި ވަނީ ރޭ ކުރެއްވި ޓްވީޓެއްގަ އެވެ.
Seedhaa R.Yameen ah thuhumathu kurevey bodethi adhadhuge fsisaage gina massala thakeh vaanee @MDPSecretariat in @PoliceMv ah ekifaharu mathin hushahalhaafa. Las nukoh e massalathah balanjehey. @ShimranAb @HomeMinistrymv #Insaafugemagah
— Hassan Latheef🎈 (@HassanLatheef) November 20, 2018
ހޯމް މިނިސްޓަރ ޝެއިޚް އިމްރާން އަބްދުﷲ ޓެކް ކުރައްވައި ހަސަން ކުރެއްވި އެ ޓްވީޓްގައި ވިދާޅުވެފައި ވަނީ ސީދާ ރައީސް ޔާމީން އަށް ތުހުމަތު ކުރެވޭ ބޮޑެތި އަދަދުގެ ފައިސާގެ ގިނަ މައްސަލަތަކެއް އެމްޑީޕީ އިން ފުލުހުންނަށް އެކިފަހަރު މަތިން ހުށަހަޅާފައިވާ ކަމަށާއި، ލަސްނުކޮށް އެ މައްސަލަތައް ބަލަންޖެހޭ ކަމަށެވެ.
ކުރީގެ ރައީސް ޔާމީންގެ ސަރުކާރުން ހިންގި ކަމަށް ބުނާ ކޮރަޕްޝަންގެ ގިނަ މައްސަލަތަކެއް އެމްޑީޕީގެ ފަރާތުން ފުލުހުންނަށް ހުށަހަޅާފައިވާއިރު، ރައީސް ޔާމީންގެ އެކައުންޓަށް އެމްއެމްޕީއާރްސީގެ ޚިޔާނާތުގެ މައްސަލައާއި ގުޅުންހުރި ކުންފުންޏަކުން އެއް މިލިއަން ޑޮލަރު ޖަމާކުރި މައްސަލައެއް ވެސް ވަނީ ފެންމަތިވެފަ އެވެ.
އެހެންނަމަވެސް ނިމިގެންދިޔަ ރިޔާސީ އިންތިޚާބުގެ ކުރިން ރައީސް ޔާމީން ވަނީ އެ ފައިސާ އެންޓި ކޮރަޕްޝަން ކޮމިޝަން (އޭސީސީ) އާއި ހަވާލުކޮށްފައެވެ.