ރައީސް އިބްރާޙިމް މުހައްމަދު ސޯލިހްގެ ވެރިކަމުގެ ފުރަތަމަ 30 ދުވަހު ތެރޭ ކުރަން ވައުދުވި ދަތުރުފަތުރާ ބެހޭ ކަންތައްތަކުގެ ތެރެއިން ނުނިމި ބާކީ އޮތީ ހަމައެކަނި އެތެރޭގެ އުދުހުންތަކުގެ އަގު ތިރިކުރުން ކަމަށާއި މިހަފްތާ ތެރޭ އެކަން ކުރެވޭނެ ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
މިނިސްޓަރު ނަހުލާ ދެއްވި ޕްރެސް ކޮންފަރެންސެއްގައި ވިދާޅުވީ އެތެރޭގެ އުދުހުންތަކުގެ އަގު ތިރިކޮށް، ލުއި ކުރެވުނު އަގުތައް ދެ ދުވަސް ތެރޭ އިއުލާން ކުރެވޭނެ ކަމަށެވެ. އަދި އެކަމުގެ މަޝްވަރާތައް އައިލޭންޑް އޭވިއޭޝަނާ ދެމެދު ކުރެވުނު ކަމަށާއި ތާވަލެއްވެސް އެކުލަވާލެވިފައިވާ ކަމަށް ވިދާޅުވިއެވެ.
މިނިސްޓަރު ނަހުލާ ވިދާޅުވީ އަގުތައް އިއުލާން ކުރެވުނު ނަމަވެސް އަމަލީ ގޮތުން ބަދަލެއް އައުމަށް ދެ ހަފްތާ ވަރުގެ މުއްދަތެއް އަދިވެސް ނަގާނެ ކަމަށެވެ.
ރައީސް އިބޫ ސޯލިހް ވަނީ އެތެރޭގެ އުދުހުންތަކުގެ އަގު އުފުލިފައިވާ ކަން ފާހަގަކުރައްވައި އެކަމަށް ހެޔޮ ބަދަލެއް ގެންނަވާނެ ކަމަށް އެމަނިކުފާނުގެ ކެމްޕޭނުގައި ވައުދުވެވަޑައިގެންފައެވެ.