އާ އަހަރު ފާހަގަކުރުމަށް މާލޭގައި ކޮންމެ އަހަރަކު ބާއްވާ މިއުޒިކް ޝޯ މިއަހަރު ނުބާއްވާނެ ކަމަށް އެ ހަފުލާ އިންތިޒާމްކުރާ އެމްއެމްޕީއާރްސީ އިން ބުނެފިއެވެ.
ބައެއް މީޑިޔާތަކަށް އެމްއެމްޕީއާރްސީ އިން މައުލޫމާތު ދެމުން ބުނެފައިވަނީ މިފަހަރު ހަވާ އެރުވުމާއި މިއުޒިކް ޝޯ ބޭއްވުމެއް ނޯންނާނެ ކަމަށެވެ. ކުރީގެ ނައިބު ރައީސް އަހުމަދު އަދީބު މަގާމުގައި ހުންނެވިއިރު ފެއްޓެވި ޓުއަރިޒަމް އެރައިވަލް ކައުންޓްޑައުން ޝޯއަށް ބޭރުގެ ފަންނާނުން ގެނައުމަށާއި ހަވާ އެރުވުމަށް ބޮޑެތި ޚަރަދުތަކެއް ކޮށްފައިވެއެވެ.
މިފަހަރު އެފަދަ ފާހަގަކުރުމެއް ނުބާއްވަން އެމްއެމްޕީއާރްސީ އިން ނިންމާފައިވާއިރު ރައީސް އިބްރާހިމް މުހައްމަދު ސޯލިހްގެ ސަރުކާރުން އަންނަނީ ޚަރަދު ކުޑަ ކުރުމަށް މަސައްކަތް ކުރަމުން ކަމަށް ސަރުކާރުގެ އިސް ފަރާތްތަކުން ވަނީ ބުނެފައެވެ.
އެމްއެމްޕީއާރްސީ އިން މި ޝޯ ނުބާއްވަން ނިންމި ސަބަބެއް ހާމަކޮށްފައެއް ނުވެއެވެ.