ޕީޕަލްސް ނެޝަނަލް ކޮންގްރެސް (ޕީއެންސީ) އުފެއްދުމުގެ ހުއްދަ އިލެކްޝަންސް ކޮމިޝަން (އީސީ) އިން މިއަދު ދިނުމާއި ގުޅިގެން، ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު އަހްމަދު ނިހާން ހުސެއިން މަނިކު، ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް އަށް މަރުޙަބާ ދަންނަވައިފި އެވެ.
ނިހާން، ރައީސް ޔާމީން އަށް މަރުޙަބާ ދަންނަވާފައި ވަނީ ދާދިދެންމެއަކު ކުރެއްވި ޓްވީޓެއްގަ އެވެ.
Heartfelt Congratulation to Ex-President Yamin Abdul Qayoom, and salute to my friend and Colleague Abdul Raheem Abdullah @Banafsaa . Thank You @electionsmv for the approval to form the new political party People’s National Congress. #letsSignNow pic.twitter.com/fcgR9YL6zj
— Ahmed Nihan (@ahmed_nihan) December 27, 2018
އެ ޓްވީޓްގައި ނިހާން ވަނީ ޕީއެންސީގެ ބާނީ، ޔާމީން އަށް ހިތުގެ އެންމެ ފުންމިނުން ޝުކުރު ދަންނަވައި، އެ ޕާޓީ އުފެއްދުމަށް އީސީ އަށް ހުށަހެޅުއްވި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އަށްވެސް ސެލިއުޓް ކުރައްވާފައެވެ.
އަދި ޕީޕަލްސް ނެޝަނަލް ކޮންގްރެސްގެ ނަމުގައި އާ ސިޔާސީ ޕާޓީއެއް އުފެއްދުމުގެ ހުއްދަ ދެއްވިކަމަށްޓަކައި ނިހާން ވަނީ އިލެކްޝަންސް ކޮމިޝަނަށް ވެސް ޝުކުރުދަންނަވާފަ އެވެ.
ޕީއެންސީ އުފެއްދުމުގެ ހުއްދަ އީސީ އިން މިއަދު ދީފައިވާއިރު، ސިޔާސީ ޕާޓީއެއް ރަޖިސްޓްރީ ކޮށްދޭނީ މަދުވެގެން 3،000 މީހުންގެ ސޮޔާ އެކު ހުށަހެޅުމުންނެވެ. އަދި ދައުލަތުން ސިޔާސީ ޕާޓީތަކަށް ދޭ ފައިސާ ލިބޭނީ 10،000 މީހުން ހަމަވާ ޕާޓީތަކަށް އެކަންޏެވެ.