އިއްޔެ އަވަހާރަވި މުހައްމަދު ވަހީދު (ނަދުވީ) އަކީ ދިވެހި ތާރީޚުގެ ގިނަ ދިރާސާތަކެއް ކުރައްވާފައިވާ ބޭފުޅެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިހެން ވިދާޅުވީ މިއަދު ކުރެއްވި ޓްވީޓެއްގަ އެވެ.
Mohamed Waheed (Nadhvi) akee Dhivehi thaareekh ge ginaguna dhiraasaa thakeh kuravvaafaivaa kulhadhaana liyuntheriehge ithurun, ehaame thedhuveri dhaulathuge khidumaitherieh. Maiy Allah marhoom ah suvaruge minvaru kuraavashi. Aameen
— Mohamed Nasheed (@MohamedNasheed) December 29, 2018
އެ ޓްވީޓްގައި ނަޝީދު ވިދާޅުވެފައި ވަނީ ނަދުވީ އަކީ ދިވެހި ތާރީޚުގެ ގިނަ ދިރާސާތަކެއް ކުރައްވާފައިވާ ކުޅަދާނަ ލިޔުންތެރިއެއްގެ އިތުރުން، އެހާމެ ތެދުވެރި، ދައުލަތުގެ ޚިދުމަތްތެރިއެއް ކަމަށެވެ.
"މާތް ﷲ މަރްޙޫމް އަށް ސުވަރުގެ މިންވަރު ކުރައްވާށި. އާމީން"، ނަޝީދުގެ ޓްވީޓްގައި ވިދާޅުވެފައި ވެއެވެ.
ނަދުވީ އަވަހާރަވެފައި ވަނީ އާލާސްކަންފުޅެއްގައި އުޅުއްވަނިކޮށް އައިޖީއެމްއެޗްގައި ފަރުވާ ދެމުން ދަނިކޮށް އިއްޔެ ހެނދުނުގެ ވަގުތެއްގަ އެވެ.
އިސްލާމީ އިލްމާއި، ޕޮލިޓިކަލް ސައިންސްގެ އިތުރުން އަދަބިއްޔާތުގެ ދާއިރާއިން ތަޢުލީމް ހާސިލްކުރައްވާފައިވާ ނަދުވީ އަކީ ދިވެހި ބަހާއި ތާރީޚަށް ހިދުމަތް ކުރާ މަރުކަޒުގައި 20 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ ބޭފުޅެކެވެ.
ރައީސް މުހައްމަދު އަމީން ކިޔަވާ ވިދާޅުވި އިންޑިއާގެ އަލީގަޅު މުސްލިމް ޔުނިވާސިޓީ އިން މާސްޓަރސް ހާސިލްކުރެއްވި ނަދުވީ ވަނީ ފަތްތޫރު ފަދަ މަޖައްލާތަކަށްވެސް ލިޔުއްވާފައެވެ. ނަދުވީ އަވަހާރަވީ އިރު ހުންނެވީ ދިވެހިބަހުގެ އެކެޑެމީގެ ތާރީޚު ބައިގެ ޑެޕިއުޓީ ޑިރެކްޓަރުގެ މަގާމުގައެވެ.