މާލޭގެ މަގުމައްޗަށް ކުނި އެޅި މީހަކު ޖޫރިމަނާކޮށް، އޭނާ ދިރިއުޅޭ ގޭގެ ނަން އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ) އިން އާންމުކޮށްފި އެވެ.
އީޕީއޭ އިން އިއްޔެ ކުރި ޓްވީޓެއްގައި ބުނެފައި ވަނީ މަގަށް މަގަށް ކުނި އަޅައިގެން ޖޫރިމަނާކޮށްފައި ވަނީ ހ. ހަނދުވަރުދޭގޭގެ ތިންވަނަ ފަންގިފިލާގައި ދިރިއުޅޭ މީހަކު ކަމަށާއި، އޭނާ ޖޫރިމަނާ ކުރީ ހ. ސަދުބަރަކާގެ ކައިރިއަށް ކުނި އަޅަން އުޅެނިކޮށް ކަމަށެވެ.
Today, a person living in 03rd floor of H. Handhuvarudheyge has been fined under the Waste Regulation (2013-R-58) for dumping waste at H.Sadhubarakaage corner, Mustharee Magu. We thank @PoliceMv for the continued collaboration in enforcing the waste regulation.
— EPA Maldives (@EPAMaldives) January 2, 2019
އެ މީހާ މަގަށް ކުނި އެޅިކަން ރިޕޯޓްކޮށްފައި ފުލުހުންނެވެ. އެހެންކަމުން ކުނި މެނޭޖުކުރުމާއި ބެހޭ ޤަވާއިދު ތަންފީޒްކުރުމުގައި ފުލުހުން ވެދެއްވި އެހީތެރިކަމަށްޓަކައި އީޕީއޭ އިން ވަނީ ފުލުހުންނަށް ޝުކުރު އަދާކޮށްފައެވެ.
މިއީ މަގުމައްޗަށް ކުނި އަޅައިގެން މީހެއްގެ ނަން އީޕީއޭ އިން އާންމުކުރި ފުރަތަމަ ފަހަރެވެ.
ޤާނޫނުގައި ބުނެފައިވާ ގޮތުން މަގުމައްޗަށް ކުނި އަޅާ މީހުންގެ އަތުން ޖޫރިމަނާގެ ގޮތުގައި ފުރަތަމަ ނަގާނީ 300ރ. އެވެ. އަދި އެ ކުށް ތަކުރާރުކޮށްފި ނަމަ އެ މީހެއްގެ އަތުން 500 ރުފިޔާ ނެގޭއިރު، އެއީ ނުރައްކާތެރި ބާވަތެއްގެ ކުނި ނަމަ، އެ އަދަދު އިތުރު ކުރުމުގެ ބާރު ވެސް ޤާނޫނުން އީޕީއޭ އަށް ވަނީ ދީފަ އެވެ.