ރައީސް އިބްރާހިމް މުހައްމަދު ސޯލިހު އަށް އެއްބާރުލުން ދެއްވުމުގައި މައުމޫން ރިފޯމް މޫމެންޓް (އެމްއާރްއެމް) ދެމި އޮންނާނެ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
މައުމޫން މިރޭ ކުރެއްވި ޓްވީޓެއްގައި ވިދާޅުވީ ކޯލިޝަނުގެ ބަދަހިކަން ދެމެހެއްޓުމަށް އެމްއާރްއެމް އިން ވަރަށް ބުރަކޮށް މަސައްކަތް ކުރާނެ ކަމަށެވެ. އަދި ގާނޫނުތަށް ނަގަހައްޓައި ރަނގަޅު ވެރިކަމެއް ކޮށްދެއްވުމަށް ރައީސް ސޯލިހު އަށް އެއްބާރުލުން ދެއްވުމުގައި ވެސް އެމްއާރްއެމް ދެމި އޮންނާނެ ކަމަށް މައުމޫން ވިދާޅުވިއެވެ.
As one of the coalition partners, MRM will work tirelessly towards strengthening the 4-party coalition and continue to fully support President @ibusolih in safeguarding the rule of law and good governance in Maldives.
— Maumoon Abdul Gayoom (@maumoonagayoom) January 24, 2019
މައުމޫން މިހެން ވިދާޅުވެފައިވާއިރު ސަރުކާރު ކޯލިޝަނުގައި ހިމެނޭ އެމްޑީޕީ އާއި ޖުމްހޫރީ ޕާޓީގެ މެދުގައި ވަނީ ހިޔާލުތަފާތުވުންތަކެއް އުފެދިފައެވެ.
މި ހިޔާލުތަފާތުވުންތައް އުފެދިގެން އުޅެނީ ކުރިއަށް އޮތް މަޖިލީހުގެ އިންތިހާބުގެ ގޮނޑިތައް ބެހުމުގެ މައްސަލާގައި ކަމަށްވާއިރު، އެމްޑީޕީން ވަނީ ކޯލިޝަނާއި ވަކިން މަޖިލީހުގެ 87 ދާއިރާގެ ތެރެއިން 86 ދާއިރާ އަށް ވާދަކުރަން ނިންމާފައެވެ.
މިކަމާ ޖޭޕީން ހިތްހަމަ ނުޖެހުން ފާޅުކުރަމުންދާއިރު އެ ޕާޓީގެ ލީޑަރު ގާސިމް އިބްރާހިމް ދާދިފަހުން ވަނީ ޖޭޕީއާ ގުޅިގެން މަޖިލީހުގެ އިންތިހާބުގައި ވާދަކުރަން ބޭނުންވާ ހުރިހާ ފަރާތްތަކާ އެކު ވާހަކަދައްކަން ތައްޔާރަށް ހުންނެވި ކަމަށް ވިދާޅުވެފައެވެ. އަދި ޖުމްހޫރީ ޕާޓީގެ ފަރާތުން ބާއްވާ ޖަލްސާތަކުގައި ގާސިމް ގެންދަވަނީ އެމްޑީޕީ އަށް ބަހުގެ ހޫނު ހަމަލާތަކެއް ވެސް ރައްދު ކުރައްވަމުންނެވެ.