ވޯޓު ކަރުދާހުގައި ކެންޑިޑޭޓުގެ އަސްލު ނަމުގެ އިތުރުން އާންމު ނަމެއް ޖެހުމުގެ ހުއްދަ ދިނުމަށް އިލެކްޝަންސް ކޮމިޝަން (އީސީ) އިން ނިންމައިފި އެވެ.
މިކަން ހާމަކޮށްފައި ވަނީ އީސީ އިން މިއަދު ކުރި ޓްވީޓެއްގަ އެވެ.
ރައްޔިތުންގެ މަޖިލީސް އިންތިޚާބު 2019ގެ ވޯޓު ކަރުދާހުގައި ކެންޑިޑޭޓުގެ ފުރިހަމަ ނަމުގެ އިތުރުން ޢާންމު ނަމެއް ޖެހުމުގެ ހުއްދަ ދިނުމަށް ކޮމިޝަނުން ނިންމަވައިފި
— Elections Commission (@ElectionsMv) March 5, 2019
އެގޮތުން އެ ޓްވީޓްގައި އީސީ އިން ބުނެފައި ވަނީ އަންނަ އޭޕްރީލް މަހު ބާއްވާ ރައްޔިތުންގެ މަޖިލީސް އިންތިޚާބުގެ ވޯޓު ކަރުދާހުގައި ކެންޑިޑޭޓުގެ ފުރިހަމަ ނަމުގެ އިތުރުން ޢާންމު ނަމެއް ޖެހުމުގެ ހުއްދަ ދިނުމަށް އެ ކޮމިޝަނުން ނިންމާފައިވާ ކަމަށެވެ.
އަންނަ އޭޕްރީލް މަހުގެ 06 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ޖުމްލަ 87 ދާއިރާއަކަށް 393 ކެންޑިޑޭޓުން ވާދަކުރާއިރު، އިންތިޚާބުގައި ވޯޓުލުމުގެ ޙައްޤު ލިބިގެންވާ މީހުންގެ އަދަދު 264،589 އަށް އަރައެވެ.