މިދިޔަ ހޮނިހިރު ދުވަހު ބޭއްވި ރައްޔިތުންގެ މަޖިލީހުގެ އިންތިހާބުގައި އެމްޑީޕީން ހޯދި ކާމިޔާބީއާ ގުޅިގެން އެ ޕާޓީގެ ރައީސް މުހައްމަދު ނަޝީދަށް ފޯނުން ގުޅުއްވައި ކުރީގެ ރައީސް މައުމޫން އަބްދުލްގައްޔޫމް މަރުހަބާ ވިދާޅުވެއްޖެއެވެ.
ނަޝީދަށް ގުޅުއްވައި މަރުހަބާ ދެންނެވިކަން މައުމޫން ހާމަކުރެއްވީ މިއަދު ކުރެއްވީ ޓްވީޓެއްގައެވެ.
I called former president @MohamedNasheed earlier today and congratulated him on his and his party’s success at the polls. He welcomed my call warmly and we agreed to keep in touch. @MDPSecretariat @MRM_Office @ibusolih
— Maumoon Abdul Gayoom (@maumoonagayoom) April 10, 2019
މަޖިލިސް އިންތިހާބުގައި 87 ދާއިރާ އަށް މެމްބަރުން އިންތިހާބުކޮށްފައިވާއިރު، އެމްޑީޕީން ވަނީ 65 ދާއިރާއެއްގެ ގޮނޑި ކާމިޔާބުކޮށް މަޖިލީހުގެ ބޮޑު މެޖޯރިޓީއެއް ހޯދާފައެވެ.
މިއީ މަޖިލިސް އިންތިހާބެއްގައި މިހާތަނަށް އެއް ޕާޓީއަކަށް މިހާ ގިނަ އަދަދަކަށް ގޮނޑި ހޯދުނު ފުރަތަމަ ފަހަރު ކަމަށްވާއިރު، މިއީ މަޖިލިސް އިންތިހާބުގެ މެޖޯރިޓީ ވެސް އެމްޑީޕީ އަށް ލިބުނު ފުރަތަމަ ފަހަރުވެސް މެއެވެ.
އެމްޑީޕީން ބޮޑު މެޖޯރިޓީއެއް ހޯދިއިރު އިންތިހާބުގެ އިތުރު ގޮނޑިތަކަށް ބަލާއިރު ޖުމްހޫރީ ޕާޓީ އިން ފަސް ގޮނޑި ކާމިޔާބުކޮށްފައިވާއިރު ޕީޕީއެމް އަށްވެސް ލިބިފައިވަނީ ފަސް ގޮނޑިއެވެ. ކޮންގްރެސް ޕާޓީ އަށް ތިން ގޮނޑި ލިބުނުއިރު މިނިވަން ކެންޑިޑޭޓުންނަށް ހަތް ގޮނޑި އަދި އެމްޑީއޭ އަށް ލިބުނީ ދެ ގޮނޑިއެވެ.
މި އިންތިހާބުގައި މިހާރު ހިނގަމުންދާ 18 ވަނަ މަޖިލީހުގައި ތިއްބެވި ގިނަ މެމްބަރުންތަކަކަށް ވަނީ ނާކާމިޔާބީއާ ކުރިމަތިލާން ޖެހިވަޑައިގެންފައެވެ.