ފުލުހުން މުއައްސަސާ އިސްލާހު ކުރުމުގައި ލަސްތަކެއް އުޅޭތީ ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ކަންބޮޑުވެވަޑައިގެންފިއެވެ.
މީގެ ފަނަރަ އަހަރު ކުރިން މާފުށި ޖަލުގައި އީވާން ނަސީމް މަރުވެގެން ދިޔުމާއި އެކަމުގައި ހިނގި ހަމަ ނުޖެހުންތަކާއި ގުޅޭ ގޮތުން ޓްވީޓު ކުރައްވާ ރައީސް ނަޝީދު ވިދާޅުވީ އީވާން މަރުގެ މައްސަލާގައި ގިނަބަޔަކު އޭރުގެ ސަރުކާރާއި ދެކޮޅަށް އަޑުއުފިލި ކަމަށެވެ. އަދި އެކަމުގެ ސަބަބުން މުޒާހަރާ ކުރި ފަރާތްތަކަށްވެސް އެތައް އަނިޔާތަކެއް ލިބިގެންދިޔަކަން ފާހަގަކުރައްވާ ނަޝީދު ވިދާޅުވީ އެ ހާދިސާއަކީ ރާއްޖޭގެ ޑިމޮކްރަސީގެ ވެސް ފެށުން ކަމަށް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެކަމުގައި އަމަލީ ގޮތުން ބައިވެރިވީ އޭރުގެ ނޭޝަނަލް ސެކިއުރިޓީ ސާވިސް (އެންއެސްއެސް)ގެ ފުލުހުންގެ ޑިވިޝަނުން ކަމަށެވެ. އަދި މިއަދުވެސް ފެންނަމުން ދަނީ ފުލުހުންގެ މުއައްސަސާ ރިފޯމް ނުވެ އޮތްތަން ކަމަށާއި އެކަމުގައި ފުލުހުން މުއައްސަސާގެ ސްޕީޑު ލަސް ކަމަށް ވިދާޅުވެ ނަޝީދު ވަނީ ކަންބޮޑުވުން ފާޅުކޮށްފައެވެ.
15 years ago today, the police division of NSS beat Evan Naseem to death in Maafushi jail. Then they shot unarmed inmates who protested Evan’s murder. Those killings sparked riots in Male’, and the start of the democracy movement. It’s worrying police reform is not moving faster.
— Mohamed Nasheed (@MohamedNasheed) September 19, 2019
އީވާން ނަސީމް މަރުވިއިރު އޭނާގެ އުމުރަކީ 19 އަހަރެވެ. މިފަހަކަށް އައިސް ރައީސް ނަޝީދު އަންނަނީ ފުލުހުންގެ މުއައްސަސާއަށް ވަރަށް ބޮޑަށް ފާޑު ވިދާޅުވަމުންނެވެ. އަދި ވަކިން ހާއްސަކޮށް ނޫސްވެރިޔާ އަހުމަދު ރިލްވާންގެ މައްސަލާގައި ފުލުހުންގެ މުއައްސަސާއަށާއި އެކަމުގައި ޝާމިލުވި ފަރާތްތަކަށް ނަޝީދު އަންނަނީ ފާޑު ވިދާޅުވަމުންނެވެ.