އަލިފާނުގެ ހާދިސާއާ ގުޅިގެން ހާލުގައި ޖެހުނު އާއިލާތަކަށް އާއްމުން އެހީތެރިކަން ފޯރުކޮށްދެން ފަށައިފިއެވެ.
އެގޮތުން ބައެއް އާއްމުން ވަނީ އަންނައުނާއި ކުޑަކުދިން ކުޅޭ ސާމާނު ގެންގޮސްފައެވެ.
ކަލާފާނު ސުކޫލުގައި ތިބި އާއިލާތަކަށް، ބްލޭންކެޓް ބެޑްޝީޓް، ބޯފެން އަދި ކާތަކެތީގެ އިތުރުން ކުޑަކުދިންނަށް ނެޕީ އަދި ލާން ހެދުން ފަދަ ތަކެތި ބޭނުންވާތޯ އެހީތެރިކަން ފޯރުކޮށްދެވޭ މީހުން ކޮށް ދިނުމަށް ކަމާ ގުޅުންހުރި މުއައްސަސާތަކުން އަންނަނީ އެދެމުންނެވެ.
އެހީތެރިކަން ފޯރުކޮށްދޭން ބޭނުންވާ ފަރާތަކުން 7449656 ނުވަތަ 9976766 ގުޅުވުމަށް ވަނީ އިލްތިމާސްކޮށްފައެވެ.
އަލިފާނުގެ ހާދިސާއާ ގުޅިގެން ހުސްކުރި އިމާރާތްތަކުގައި ތިބި ހުރިހާ އެންމެން ކަލާފާނު ސުކޫލަށް ޖަމާވުމަށް ޑިޒާސްޓާ މެނޭޖްމެންޓުން އެދެފައެވެ.
ހެންވޭރު ފެހިއާބާދު ގޭގައި ހިނގައިގެން އުޅޭ އަލިފާނުގެ ހާދިސާގެ އަސަރުކޮށް މިހާތަނަށް 56 މީހުން އޭޑީކޭއަށް ފަރުވާ ހޯދުމަށް ގޮސްފައިވާކަމަށް ހެލްތު މިނިސްޓަރު އަބްދުﷲ އަމީން ވަނީ ވިދާޅުވެފައެވެ.
އަމީން ވިދާޅުވީ އޭޑީކޭއަށް ގެންދިޔަ 56 މީހުންގެ ތެރެއިން 46 މީހަކު ފަރުވާ ދިނުމަށްފަހު ދޫކޮށްލާފައިވާ ކަމަށެވެ. އަދި 10 މީހަކަށް އެޑްމިޓްކޮށް ފަރުވާ ދެމުން އަންނަ ކަމަށެވެ.