ކުރީގެ ރައީސް މައުމޫން އަބްދުލްޤައްޔޫމް، ރައީސް އިބްރާހިމް މުހައްމަދު ސޯލިހާއި މިއަދު ބައްދަލު ކުރައްވައިފިއެވެ.
މި ބައްދަލުކުރެއްވުމަށްފަހު މައުމޫން ކުރެއްވި ޓްވީޓެއްގައި ވިދާޅުވީ ރާއްޖޭގައި ހުރި މައްސަލަތަކާ މެދު މި ބައްދަލުކުރެއްވުމުގައި މަޝްވަރާ ކުރެވުނު ކަމަށެވެ.
ނަމަވެސް މި ބައްދަލުކުރެއްވުމުގައި މަޝްވަރާ ކުރެވުނު ކަންކަމާ ގުޅޭ އިތުރު ތަފްސީލެއް މައުމޫން ދެއްވާފައެއް ނުވެއެވެ.
Thank you Mr President @ibusolih for the opportunity to discuss with you some matters of immediate national concern. I appreciate YE’s candour and openness. @presidencymv @MRM_Office pic.twitter.com/dmfyJbLQlA
— Maumoon Abdul Gayoom (@maumoonagayoom) March 11, 2020
މައުމޫން، ރައީސް ސޯލިހާއި ބައްދަލުކުރެއްވިއިރު ކޮރޯނާވައިރަހާ ގުޅިގެން ކުރިއަށް އޮތް ލޯކަލް ކައުންސިލް އިންތިހާބު
ފަސްކުރަން މައުމޫން އިއްޔެ ވަނީ ގޮވާލައްވާފައެވެ.
ނަމަވެސް އެމްޑީޕީ އާއި އިދިކޮޅު ޕީޕީއެމް/ޕީއެންސީ ކޯލިޝަނުގެ އިސްވެރިން ވަނީ މިކަމާ ދެކޮޅު ހައްދަވާފައެވެ.
އަދި ލޯކަލް ކައުންސިލް އިންތިހާބު ފަސް ކުރަންޖެހޭ އެއްވެސް ހާލަތެއް އަދި ރާއްޖޭގައި ނެތް ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފު ވެސް މިއަދު ވަނީ ވިދާޅުވެފައެވެ.
ކޮރޯނާ ވައިރަހަށް މިހާތަނަށް ރާއްޖެއިން އަށް މީހަކު ޕޮޒިޓިވް ވެފައިވާއިރު، ކައުންސިލް އިންތިހާބު ބޭއްވުމަށް ހަމަޖެހިފައިވަނީ އަންނަ މަހުގެ ހަތަރުވަނަ ދުވަހުއެވެ.