އައްޑޫ ސިޓީގެ އިންޖީނުގޭގެ ޕެނަލް އަޕްގްރޭޑް ކުރުމުގެ މަސައްކަތަށް މާދަމާ ދެ ގަޑިއިރަށް ކަރަންޓު ކެނޑުމަށް ނިންމައިފިއެވެ.
ފެނަކަ އިން ބުނީ މި މަސައްކަތް ކުރުމަށް އައްޑޫން ކަރަންޓް ކެނޑުމަށް ނިންމާފައިވަނީ މާދަމާ ހެނދުނު 10:00 އިން 12:00 އަށް ކަމަށެވެ.
ނަމަވެސް ރޭވިފައިވާ ގޮތަށް އިތުރު މައްސަލައެއް ދިމާނުވެ މަސައްކަތް ކުރިއަށް ގެންދެވިއްޖެނަމަ ހަމަޖެހިފައިވާ ގަޑިއަށް ވުރެ އަވަހަށް ކަރަންޓު ދެވޭނެ ކަމަށް ލަފާކުރެވޭ ކަމަށްވެސް ފެނަކަ އިން ބުނެއެވެ.
"ކަރަންޓް މެދުކެނޑިފައި އޮންނަ ވަގުތުތަކުގައި ތިޔަ ފަރާތްތަކަށް ދިމާވެދާނެ ދަތިތަކަށް ނިހާޔަތަށް މައާދަށް އެދެން" ފެނަކައިން ބުނެއެވެ.
އައްޑޫ އިންޖީނުގޭގެ ޕެނަލް އަޕްގްރޭޑް ކުރުމުގެ މަސައްކަތަށް ފެނަކަ އިން ކުރުމަށް ހަމަޖެހިފައިވާއިރު، މިދިޔަ ރޯދަ މަހުގެ ތެރޭގައި ހަތަރު ފަހަރެއްގެ މަތިން އައްޑޫން ކަރަންޓު ކެނޑިފައިވެއެވެ.