ޢަދާލަތު ޕާޓީގެ މަޝްވަރާ މަޖިލީހަށް ޤައުމީ މަޖިލީހުން އިންތިޚާބުކުރާ 12 މެމްބަރުންގެ މަޤާމަށް ކުރިމަތިލުމުގެ ފުރުސަތު ހުޅުވާލައިފިއެވެ.
އަދާލަތު ޕާޓީން ބުނެފައިވަނީ ޕާޓީގެ ދުސްތޫރުގެ 13.1 ގެ (ރ) އާއި 17.2 ގެ (މ)ގެ ދަށުން ޢަދާލަތު ޕާޓީގެ މަޝްވަރާ މަޖިލީހަށް ޕާޓީގެ ޤައުމީ މަޖިލީހުން އިންތިޚާބުކުރަން ޖެހޭ 12 މެންބަރުންގެ މަޤާމަށް ކުރިމަތިލުމަށްޓަކައި ހުޅުވާލައި އާއްމުކޮށް އިއުލާނު ކުރާކަމަށެވެ.
އަދާލަތު ޕާޓީގެ މަޝްވަރާ މަޖިލީހަށް ކުރިމަތިލުމުގެ ފުރުސަތު ހުޅުވާލާފައިވަނީ މިއަދު މެންދުރުފަހުގެ 14:00 އާއި ހަމައަށެވެ.
މި މަޤާމަށް ކުރިމަތިލާ މެމްބަރުންނަކީ އުމުރުން 40 އަހަރުވެފައިވެފައިވާ، އަދާލަތު ޕާޓީގެ މެމްބަރެއްގެ ގޮތުގައި މެދުނުކެނޑި 10 އަހަރު ވެފައިވެފައިވާ، ޕާޓީގެ ސުލޫކު ކޮމިޓީއިން ފާއިތުވި 3 އަހަރުތެރޭގައި ފިޔަވަޅުއަޅާފައިނުވާ އަދި އިސްލާމީ ޝަރީޢަތުގައި ހައްދު ކަނޑައެޅިފައިވާ ކުށެއް ކުރިކަން ފާއިތުވި 10 އަހަރުތެރޭގައި ސާބިތުވެފައި ނުވާ ފަރާތަކަށް ވާންޖެހެއެވެ.
އަދާލަތު ޕާޓީގެ މަޝްވަރާ މަޖިލީހަށް ކުރިމަތިލުމުގެ ފުރުސަތު ހުޅުވާލާފައިވަނީ މިހާރު ކުރިއަށްދާ އެ ޕާޓީގެ ޤައުމީ މަޖިލީހުގެ ބައްދަލުވުމުގެ ތެރެއިންނެވެ.