ކޮންސްޓްރަކްޝަން މަސައްކަތަށް މާލޭގެ މަގުތައް ބަންދުކުރުމަށް އެންމެ ރަނގަޅު ގަޑި ބެލުމަށް މާލެސިޓީ އިންތިހާބީ މޭޔަރު ޑރ. މުހައްމަދު މުއިއްޒު ސޯޝަލް މީޑިއާގައި އާންމުންގެ ހިޔާލު ހޯދުމަށް ހުޅުވާލައިފިއެވެ.
ޑރ. މުއިއްޒު ޓްވިޓާގައި އާންމުކުރެއްވި ޕޯލެއްގައި ވިދާޅުވެފައިވަނީ ކޮންސްޓްރަކްޝަން މަސައްކަތަށް މަގު ބަންދުކުރުމުގައި އާންމުނަށް އުނދަގޫވުން އެންމެ ކުޑަ ވަގުތެއް ހިޔާރުކުރުން މުހިންމު ކަމަށެވެ.
އަދި ޑރ. މުއިއްޒުގެ ޓްވީޓްގައި ވަނީ އާންމުންގެ ހިޔާލުހޯދުމަށް ވަގުތުތަކެއް ވެސް ހިމަނާފައިވެއެވެ.
Construction masakkathah magu bandhu kurumugai aammunah undhagoovun emme kuda vagutheh khiyaarukurun muhimmu. Construction masakkathah magu bandhu kurun emme rangalhee kon vaguthaku tho?
— Dr Mohamed Muizzu (@MMuizzu) April 23, 2021
ކުރީގެ ރައީސް އަބްދުﷲ ޔާމީންގެ ސަރުކާރުގައި ހައުސިން މިނިސްޓަރުކަން ކުރެއްވި ޑރ. މުއިއްޒު މާލެސިޓީ މޭޔަރުކަމަށް އިންތިހާބުވީ އެމްޑީޕީގެ ކެނޑިޑޭޓު އަނަސް އަބްދުއްސައްތާރު އަދި އަމިއްލަ ކެނޑިޑޭޓު އަލްހާން ފަހުމީއާއި ވާދަކޮށެވެ.
ޑރ. މުއިއްޒު އިންތިހާބުގައި މާލެސިޓި މޭޔަރުކަން ކާމިޔާބު ކުރެއްވިއިރު، ޕީޕީއެމުން ވަނީ މާލެސިޓީ ކައުންސިލްގެ މެޖޯރިޓީ ހޯދާފައެވެ. މިއީ މާލެސިޓީ ކައުންސިލް އެމްޑީޕީއަށް ގެއްލުނު ފުރަތަމަ ފަހަރެވެ.