އަންހެން ކުދިން ހިތާނު ކުރުމާ ގުޅޭގޮތުން ދެއްކި ވާހަކަތައް ބަދަލުނުކުރާނެކަމަށް ރާއްޖޭގެ ޤައުމީ ޔުނިވަރސިޓީގެ އެސިސްޓަންޓް ޕްރޮފެސަރ ޑރ. މުޙައްމަދު އިޔާޒު ވިދާޅުވެއްޖެއެވެ.
އަންހެން ކުދިން ހިތާނު ކުރުމަށް ހިތްވަރުދީ ޑރ. އިޔާޒް ކުރި ޓްވީޓާއި ގުޅިގެން ގިނަބައެއްގެ ފާޑުކިޔުން ވަނީ އޭނާއަށް އަމާޒުވެފައެވެ. އަދި އޭނާއާ ދެކޮޅަށް ފިޔަވަޅު އެޅުމަށްވެސް އަންނަނީ ގޮވާލަމުންނެވެ.
ފާޑުކިޔުންތަކަށް ރައްދުދެއްވާ ޑރ. އިޔާޒް ކުރެއްވި ޓްވީޓްގައި ވިދާޅުވެފައިވަނީ، ފެމިނިސްޓުން ބުނާ ގޮތަށް ފަތުވާ ނުދީގެން އަދަބު ދިނަސް ފަތުވާ ބަދަލުނުކުރާނެކަމަށެވެ.
މުޢުތަޒިލާ އިން ބުނާހާ ގޮތަކަށް ފަތުވާ ނުދެއްވައިގެން އިމާމް އަޙްމަދަށް އަދަބު ދެވުނު. ނަމަވެސް ފަތުވާ ބަދަލެއް ނުކުރެއްވި. ފެމިނިސްޓުން ބުނާ ގޮތަށް ފަތުވާ ނުދީގެން އަޅުގަޑަށް އަދަބު ދިނަސް އިންޝާالله ފަތުވާ ބަދަލެއް ނުކުރާނަން.
— Dr.Mohamed Iyaz (@dr_iyaz) June 26, 2021
އަންހެން ކުދިން ހިތާނު ކުރުމަށް ހިތްވަރުދީ ޑރ. އިޔާޒް ޓްވީޓް ކުރުމާ ގުޅިގެން ކުރީގެ ރައީސް މައުމޫން އަބްދުލްޤައްޔޫމް އަދި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަހުމަދު ވަނީ އެއީ ދީނުގައި އޮތްކަމެއް ނޫންކަމަށް ވިދާޅުވެފައެވެ.
އަދި ޑރ. އިޔާޒް ހުރި މަޤާމުގެ ގޮތުން އެވާހަކަ ދައްކާފައިވާތީ އެ މައްސަލަ ބަލައިދިނުމަށް އެދި ރައްޔިތުންގެ މަޖިލީހަށް ވެސް ވަނީ ހުށަހަޅާފައެވެ. މީގެއިތުރުން ހެރިޓޭޖް މިނިސްޓަރު ޔުމްނާ މައުމޫންވެސް ވަނީ އިޔާޒަށް ފިޔަވަޅު އެޅުމަށް ގޮވާލާފައެވެ