މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)އިން ހިތަދޫ އުތުރު ދާއިރާގެ މެމްބަރު މުހައްމަދު އަސްލަމާއި މެދު ކަންކުރިގޮތް އެމްޑީޕީގެ ކުރީގެ ޗެއާޕާސަން މޫސާ މަނިކް ހާމަކުރައްވައިފިއެވެ.
އެމްޑީޕީގެ ތެރޭގައި މިހާރު އުފެދިފައިވާ ނުތަނަވަސްކަމުގައި، އެމްޑީޕީގެ ތެރެއިން ސަރުކާރަށް ފާޑުކިޔާތީ އެކަމުގެ ކަންބޮޑުވުން އަސްލަމް ފާޅުކުރެއްވުމުން ރައީސް ނަޝީދަށް ތާއީދުކުރާ އެމްޑީޕީގެ ބައެއް މަޖިލިސް މެމްބަރުން އަސްލަމަށް ފާޑުކިޔަމުން އަންނައިރު ރައީސް އިބްރާހިމް މުހައްމަދު ސޯލިހަށް ތާއީދުކުރާ މަޖިލިސް މެމްބަރުން އަންނަނީ އަސްލަމްގެ ދިފާއުގައި ވާހަކަ ދައްކަވަމުންނެވެ.
މިކަމުގެ ތެރެއިން މޫސަ ކުރެއްވި ޓްވީޓުގައި ވަނީ، މީހަކު ކެތްތެރިވެ ޤުރުބާންވެގެން ކަމެއްކުރާނަމަ އެކަމެއް އަސްލަމް ކޮށްފައިވާކަމަށެވެ.
އެގޮތުން އަސްލަމަށް ރައީސުލްޖުމްހުރިއްޔާގެ ނައިބުކަމާއި، ޕާޓީގެ ނައިބުރައީސްކަމާއި، މަޖިލީހުގެ ރައީސް ކަމާއި، ޕީޖީ ލީޑަރުކަން ދޭނެކަމަށްބުނެ ކުރިމަތި ލެއްވުމަސްފަހު ފެއިލް ކުރުވާފައިވާކަމަށެވެ.
މޫސަ ތުހުމަތު ކުރެއްވި ގޮތުގައި އަސްލަމް މަގާމުތަކަށް ކުރިމަތި ލެއްވުމުން އޭނާ ފެއިލް ކޮށްލާފައިވަނީ އެމްޑީޕީގެ "ވިރާސީ ވިންގުން"ނެވެ. އެއީ ރައިސް ނަޝީދަށް ނިސްބަތްކޮށް މޫސަ ވިދާޅުވި އެއްޗެއްކަމަށް ބެލެވެއެވެ.
އަދި މޫސަ ވަނީ އަސްލަމާމެދު އަމަލުކުރަން އުޅޭ ގޮތަކާ މެދު ސުވާލު އުފައްދަވާފައެވެ.
މީހަކު ކެތްތެރިވެ ޤުރުބާވެގެން ވާނީމިވަރު
@aslamdpއަށް ޤައުމުގެ ނައިބުރައީސްކަން
ޕާޓީގެނައިބުރައީސްކަން،މަޖްލިސްގެ ރައީސްކަން ޕީޖީ ލީޑަރުކަން ދޭނަމޭބުނެ ކުރިމަތިލައްވާފަ ޕާޓީގެ ވިރާސީ ވިންގުން އަސްލަމްފެއިލްކޮށްލިމީހުން މިއަދު އަސްލަމްއަށް ކީއްކުރަން މިއުޅެނީ؟— Moosa Maniku (Reeko) (@ReekoMoosa) July 23, 2021
އެމްޑީޕީގެ ތެރޭގައި އޮތް ވާދަވެރިކަމުގައި މިހާތަނަށްވެސް އަސްލަމް ފެނިގެން ގޮސްފައިވަނީ ސައިލެންޓްކޮށް ހުންނަވާ ބޭފުޅެއްގެ ގޮތުގައެވެ. އަދި ރައިސް ނަޝީދަށް ދިން ހަމަލާގައި ސެކިއުރިޓީ ބްރީޗްވި ގޮތުގެ ޕާލިމެންޓަރީ އިންކުއަރީ ކުރިއަށް ގެންދިއުމުގައިވެސް އަސްލަމް އަމަލުކުރައްވާފައިވާގޮތަށް ގިނަ ބަޔަކު ތައުރީފް ކޮށްފައިވެއެވެ.