ކުރީގެ ރައީސް މައުމޫން އަބްދުލްޤައްޔޫމްގެ ފަރާތުން ފެންނަނީ ނުބައި ހަސީލަތް ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޖަމީލް މިފަދައިން ވިދާޅުވެފައިވަނީ ކުރީގެ ރައިސް އަބްދުﷲ ޔާމީން ޖަލުހުކުމެއްގައި ހުންނަވައިގެން އިންތިހާބުގައި ވާދަކުރެވިގެން ނުވާނެކަމަށް ރައިސް މައުމޫން ވިދާޅުވުމުންނެވެ.
ރައީސް މައުމޫންގެ ވާހަކަތަކަށް ރައްދު ދެއްވާ ޖަމީލް ކުރެއްވި ޓްވީޓްގައި ވިދާޅުވެފައިވަނީ، ހައްޤުބަސް ވިދާޅުވާން ރައީސް މައުމޫނަށް ކެރިވަޑައިނުގަތުމުން ހިތާމަކުރައްވާކަމަށެވެ.
ރައީސް ޔާމީންގެ ޝަރީއަތް އިންސާފުވެރި ނޫންކަމާއި، ޤާނޫނީ ބޮޑެތި ގޯސްތައް ހުރިކަން ސާފުކަމަށް ޖަމީލްގެ ޓްވީޓްގައިވެއެވެ.
"މިވާހަކަތައް ވިދާޅުނުވުމުން ފެންނާނީ ނުބައި ހަސީލަތް." ޖަމީލްގެ ޓްވީޓްގައިވެއެވެ.
ޙައްޤުބަސް ވިދާޅުވާން ރައީސް @maumoonagayoom އަށް ކެރިވަޑައިނުގަތުމުން ހިތާމަކުރަން. ރައީސް ޔާމީންގެ ޝަރީޢަތް އިންސާފުވެރި ނޫންކަން، ޤާނޫނީ ބޮޑެތި ގޯސްތައް ހުރިކަން ސާފު. މިވާހަކަތައް ވިދާޅުނުވުމުން ފެންނާނީ ނުބައި ހަސީލަތް. https://t.co/S7KrCOfudA
— Mohamed Jameel Ahmed (@MJameelAhmed) July 26, 2021
ރާއްޖެޓީވީގެ ޕްރޮގްރާމެއްގައި ރައީސް ޔާމީނާއި ގުޅޭގޮތުން ސުވާލު ކުރުމުން ރައީސް މައުމޫން ވިދާޅުވީ ކުރީގެ ރައީސް އަބްދުﷲ ޔާމިނަށް ކޮށްފައިވާ ހުކުމް އެގޮތައް އޮއްވާ ރިޔާސީ އިންތިހާބުގައި ވާދަކުރަން ފުރުސަތު ދެވިގެން ނުވާނެ ކަމަށެވެ. ރައީސް މައުމޫނު ވިދާޅުވީ ރައީސް ޔާމިނަށް ރިޔާސީ އިންތިހާބަށް ވާދަކުރެއްވުމަށް ފުރުސަތު ލިބެން ޖެހޭނެ ހަމަ އެކަނި ގޮތަކީ މިހާރު ކޯޓުންކޮށްފައިވާ ހުކުމް ބާތިލްކުރުން ނުވަތަ އެހެން ގޮތަކުންވިއަސް މިނިވަން ވުމެވެ.