ޓެރަރިޒަމާއި ހައްދުފަހަނައެޅުމާ ދެކޮޅަށް އެންމެ ހަރުދަނާކޮށް މަސައްކަތް ކުރެއްވީ ކުރީގެ ރައީސް އަބްދުﷲ ޔާމީން ކަމަށް ކުރީގެ ޑިފެންސް މިނިސްޓަރު އަދި މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.
އާދަމް ޝަރީފް ކުރެއްވި ޓްވީޓެއްގައި ވިދާޅުވީ ޔާމީންގެ ވެރިކަމުގައި ޓެރަރިޒަމް މަނާކުރުމުގެ ގާނޫނާއި އެންސީޓީސީ އުފެއްދެވި ކަމަށާއި ދެން ވެސް ކަމެއް ކުރެވޭނީ ޔާމީން އަށް ކަމަށެވެ.
"ރައީސް ނަޝީދު އާއި ރައީސް ސޯލިހު އެއްގަލަކަށް އަރުއްވައިގެން ވެސް ހައްދުފަހަނައެޅުމާއި ދެކޮޅަށް ކޮންމެވެސް ކަމެއް ކުރެވޭތޯ ބައްލަވާ" އާދަމް ޝަރީފް ވިދާޅުވިއެވެ.
Terrorism aai extremism aa dhekolhah emme harudhanaa masakkaiy kurevvee RY. Terrorism manaakurumuge qaanoonaai NCTC ufedhdhevi. Dhen ves kameh kurevveynee RY ah. RN aai RS eggalakah aruvaigen ves extremism aa dhekolhah kommes kameh kureveythoa ballavaa!
— Adam Shareef Umar (@Adamshareefz) July 29, 2021
ހަރުކަށި ފިކުރާއި ހައްދުފަހަނައެޅުމާއި ދެކޮޅަށް ނަޝީދު މިފަހަކަށް އައިސް އަންނަނީ ވަރަށް ބޮޑަށް ވާހަކަދައްކަވަމުންނެވެ. އެގޮތުން ދާދިފަހުން ނަޝީދު ވަނީ ހަރުކަށި ފިކުރުގެ މީހުން ހޯމް މިނިސްޓްރީ، ފުލުހުންގެ އިދާރާ، ސިފައިން، ކަސްޓަމްސް، އެޑިއުކޭޝަން މިނިސްޓްރީގައި ތިބިހާ ހިނދަކު ހަރުކަށި ފިކުރު ނައްތާލުމަށް މަސައްކަތް ނުކުރެވޭނެ ކަމަށް ވިދާޅުވިއެވެ.
"ފުރަތަމަ ރިފޯމް ކުރަންވީ މި އިދާރާތައް، އަދި ދައުލަތުގެ ތެރޭގައި އަނދިރި ދައުލަތެއް ނެތްކަން ޔަގީން ކުރަންޖެހޭ" ނަޝީދު ވިދާޅުވިއެވެ.
މިދިޔަ މޭ މަހުގެ ހަވަނަ ދުވަހުގެރޭ ނަޝީދު އަވަހާރަކޮށްލުމަށް ބޮމުގެ ހަމަލާއެއް ދީފައިވާއިރު އެ ހަމަލާ ގުޅެނީ ހަރުކަށި ފިކުރުގެ މީހުންނާ ކަމަށް ފުލުހުން ވަނީ ބުނެފައެވެ.