ރައްޔިތުން، ކުރީގެ ރައީސް އަބްދުﷲ ޔާމީން މިނިވަން ކުރާނެކަމަށް މިސަރުކާރުގެ ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލް ވިދާޅުވެއްޖެއެވެ.
އިތުބާރު ނެތްކަމަށް ފާސްކޮށް މަގާމުން ދުރުކުރި ފަހުން އެމްޑީޕީއާއި ސަރުކާރަށް ފާޑުކިޔަމުން އަންނަ މަލީހް ކުރި ޓްވީޓެއްގައި ވިދާޅުވެފައިވަނީ ސިޔާސީ ވާދަވެރިން ޖަލަށް ލައިގެން ނޫޅުމަށް ރައްޔިތުން ލޯކަލް ކައުންސިލް އިންތިހާބުގައި ބުނުމުން ރައީސް އިބްރާޙިމް މުހައްމަދު ސޯލިހް އެކަމަށް އިޖާބު ނުދީ އަނިޔާވެރިކަން އިސްކޮށްފައިވާކަމަށެވެ.
އަދި އެކަމަކީ ރައީސް ސޯލިހް ގޯހުން ކުރައްވާ ކަމެއްކަމަށް މަލީހް ވިދާޅުވިއެވެ. އަދި ރައްޔިތުން ރައީސް ޔާމީން މިނިވަން ކުރާނެ ކަމަށާއި އެކަމާ ޝައްކު ނުކުރައްވާކަމަށް މަލީހް ވިދާޅުވިއެވެ.
ރައީސް އިބޫ ސިޔާސީ ވާދަވެރިން ޖަލަށް ލައިގެން ނޫޅުއްވާށޭ ރައްޔިތުން ލޯކަލް ކައުންސިލް އިންތިޚާބުގައި ސާފުބަހުން ހާމުކުރުމުން އެކަމަށް އިޖާބަނުދެއްވާ އަނިޔާވެރިކަން އިސްކުރުން ގޯސް. ރައްޔިތުން ރައީސް ޔާމީން މިނިވަން ކުރާނެ. އެކަމާ ޝައްކު ނުކުރައްވާ. pic.twitter.com/GPNO3iG7I1
— Mohamed Maleeh Jamal (@maleehjamal) September 1, 2021
ކުރީގެ ރައީސް ޔާމީންގެ މައްޗަށް މަނީލޯންޑްރިންގެ ކުށް ސާބިތުވެ ފަސް އަހަރުގެ ޖަލު ހުކުމެއް އިއްވާ ފަސް މިލިއަން ޑޮލަރުން ޖުރިމަނާ ކޮށްފައިވާއިރު އެ ހުކުމް އިއްވި ކްރިމިނަލް ކޯޓުގެ ބެންޗްގައި ހިމެނޭ ތިން ފަނޑިޔާރެއްގެ އޯޑިއޯއެއްކަމަށް ބުނާ އޯޑިއާތަކެއް ވަނީ މީޑިއާގައި ލީކް ވެފައެވެ. އަދި އޭގައި ފަނޑިޔާރުން ކަމަށް ބުނާ މީހުން ވަނީ ހުކުމް އިއްވުމުގައި ނުފޫޒެއް އޮތްކަމަށް ދޭހަވާފަދަ މޭރުމަކުން ވާހަކަ ދައްކާފައެވެ. އެހެންނަމަވެސް ޖޭއެސްސީން އެކަމާ ގުޅޭގޮތުން އެ ފަނޑިޔާރުންނާ ސުވާލު ކުރުމުން އެފަދަ ވާހަކައެއް ދައްކާފައި ނުވާނެކަމަށާއި، އެއީ ސައްހަ އޯޑިއޯއެއް ނޫންކަމަށް އެ ފަނޑިޔާރުން ވަނީ ބުނެފައެވެ. އަދި އެކަން އިތުރު ތަހުގީގު ކުރުމަށް ފަނޑިޔާރުންގެ އޯޑިއޯ ސާމްޕަލްވެސް ފުލުހަށް ދީފައިވެއެވެ.
މި އޯޑިއޯތައް ފެންމަތިވެފައިވަނީ ރައީސް ޔާމީންގެ އިސްތިއުނާފު އަޑުއެހުންތައް ސުޕްރީމް ކޯޓުގައި ތާވަލުކުރިކަން ހާމަކުރި ހިސާބުންނެވެ.