ގައުމުގެ މިނިވަންކަން ގިނަ ފަހަރު ގެއްލެނީ ވެރިން ގައުމަށް ގައްދާރުވުމުން ކަމަށާއި މިހާރު އޮތީ އެފަދަ ވެރިކަމެއްކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ގައުމީ ދުވަހުގެ މުނާސަބަތާ ގުޅުވާ ޑރ. ޖަމީލް ކުރެއްވި ޓްވީޓެއްގައި ވިދާޅުވެފައިވަނީ ކޮންމެ ނޭވާއެއް މިފަސްގަނޑު މިލަނީ ހާސްކަމާއި ބިރުވެރިކަމުގައި ކަމަށެވެ.
"ޤައުމީ ދުވަހުގެ ބަޠަލްގެ ޒިިކްރާ އާކޮށް ޤައުމްގެ ދިފާޢުގައި ތެދުވަން އެދި ގޮވަނީ." ޑރ. ޖަމީލްގެ ޓްވީޓްގައިވެއެވެ.
މިނިވަންކަން ގިނަ ފަހަރަށް ގެއްލިފައިވަނީ ވެރިން ޤައުމަށް ޤައްދާރުވުމުން. މިހާރު އޮތީ އެފަދަ ވެރިކަމެއް. ކޮންމެ ނޭވާއެއް މިފަސްގަނޑު މިލަނީ ހާސްކަމާއި ބިރުވެރިކަމުގައި. ޤައުމީ ދުވަހުގެ ބަޠަލްގެ ޒިިކްރާ އާކޮށް ޤައުމްގެ ދިފާޢުގައި ތެދުވަން އެދި ގޮވަނީ. ޤައުމީ ދުވަހުގެ ތަހްނިޔާ. pic.twitter.com/Aer4Ppq2t7
— Mohamed Jameel Ahmed (@MJameelAhmed) October 7, 2021
މި ވެރިކަން ގެނައުމަށް މަސައްކަތްކުރި ޑރ. ޖަމީލް މިސަރުކާރާ ދެކޮޅަށް ވާހަކަ ދައްކަން ފަށާފައިވަނީ މަޖިލީހުގެ އިންތިހާބުން ނާކާމިޔާބުވި ހިސާބުންނެވެ. އޭގެފަހުްނ ޖަމީލް ސަރުކާރަށާއި ރައީސް ސޯލިހަށް ނުހަނު ބޮޑަށް އަންނަނީ ފާޑުކިޔަމުންނެވެ. އަދި މީގެކުރިން ސިޔާސީ ގޮތުން އެންމެބޮޑަށް ފާޑުކި ރައީސް ޔާމީނާއެކު މިހާރު އަންނަވަނީ މަސައްކަތް ކުރައްވަމުންނެވެ.
މިސަރުކާރަށް ކުރިމަތިވެފައި އޮތް އެންމެ ބޮޑު އެއް ފާޑުކިޔުމަކީ އިންޑިއާ އާއެކު މާބޮޑަށް ގާތް ގުޅުމެއް ބޭއްވުމެވެ. އިދިކޮޅުން ތުހުމަތުކުރާ ގޮތުގައި އިންޑިއާއާއެކު ހަދާ އެއްބަސްވުންތަކުގެ ދަށުން ރާއްޖޭގައި އިންޑިއާގެ ސިފައިން ޤާއިމުވެ ތިބެވޭނެއެވެ. އަދި އިދިކޮޅުން އެންމެ ބޮޑަށް ގޮވަމުން އަންނަނީ ރާއްޖޭގައި ތިބި އިންޑިއާ ސިފައިން ބޭރުކުރުމަށެވެ.