ކޮމަންޑޫ ދާއިރާގެ އިންތިހާބުގައި ވާދަކުރާނެކަން މޯލްޑިވްސް ނެޝަނަލް ޕާޓީ (އެމްއެންޕީ)އިން ހާމަކޮށްފިއެވެ.
އެމްއެންޕީން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްއެންޕީގެ ރައީސް އަދި ދަނގެތީ ދާއިރާގެ މެމްބަރު މުހައްމަދު ނާޒިމް ވިދާޅުވީ އެޕާޓީން ކޮމަންޑޫ ދާއިރާގެ ބައި އިލެކްޝަންގައި ބައިވެރިވުމަށް ނިންމާފައިވާކަމަށާއި، އަދި އެކަމާ ގުޅޭ މައުލޫމާތު ޕާޓީގެ މެމްބަރުންނަށް ހާމަކުރާނެ ކަމަށެވެ.
މި ބައި އިލެކްޝަންގައި ވާދަކުރާނެ ކެނޑިޑޭޓެއް ކަނޑައަޅާނީ ޕާޓީގެ އެތެރޭގެ ޕްރައިމަރީ ބޭއްވުމަށްފަހުކަން ފާހަގަކޮށް ނާޒިމް ވިދާޅުވީ، ކޮމަންޑޫ ދާއިރާގެ އިންތިހާބު ކާމިޔާބު ކުރުމަށް ބޮޑު މަސައްކަތެއް ކުރާނެ ކަމަށެވެ.
ކޮމަންޑޫ ދާއިރާގެ ބައި އިލެކްޝަން ބޭއްވުމަށް ނިންމާފައިވަނީ އެ ދާއިރާގެ މެމްބަރު ހުސައިން ވަހީދު އަވަހާރަވުމާ ގުޅިގެންނެވެ.
އެ ދާއިރާގެ ބައި އިލެކްޝަންގައި ވާދަކުރުމަށް އިލެކްޝަންސް ކޮމިޝަނުން ފުރުސަތު ހުޅުވާލާފައިވަނީ މިމަހުގެ 30 ވަނަ ދުވަހުގެ ނިޔަލަށެވެ. ވޯޓުލުން ކުރިއަށް ދާނީ އަންނަ އަހަރުގެ ފެބްރުއަރީ ފަސްވަނަ ދުވަހު ކަމަށް އީސީން މައުލޫމާތުދެއެވެ.
ކޮމަންޑޫ ދާއިރާގެ ބައި އިލެކްޝަންގައި ބައިވެރިވާނެ ކެނޑިޑޭޓެއް ކަނޑައެޅުމަށް އެމްޑީޕީގެ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 27 ވަނަ ދުވަހުއެވެ.