ޣައިރު ޤާނޫނީ އަމުރިތަކަށް ތަބާވާ ވަކިވަކި ފުލުހުންނަށް ޤާނޫނުގެ ދިގު އަތް ފޯރާނެ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޑރ. ޖަމީލް މިފަދައިން ޓްވީޓް ކުރައްވާފައިވަނީ އިދިކޮޅު ޕީޕީއެމް ޕީއެންސީއިން ތަކުރާރުކޮށް ކުރަމުން އަންނަ މުޒާހަރާތަކުގައި މީހުން ހައްޔަރު ކުރަމުން ގެންދާތީއެވެ.
އެގޮތުން ޑރ. ޖަމީލް ކުރެއްވި ޓްވީޓްގައި ވަނީ، ބަޔަކު މުޒާހަރާކޮށްލާއިރަށް ރޫޅާލަނީ ފުލުހުންނަށް ކޮން ޤާނޫނަކުން ލިބިދޭ ބާރެއްގެ ދަށުންތޯ ސުވާލު އުފައްދަވާފައެވެ.
ޑރ. ޖަމީލް ވިދާޅުވީ ކޮންމެ ޣައިރުޤާނޫނީ ޢަމަލަކަށް ޖަވާބުދާރީކުރުވޭނެ ކަމަށާއި ވަކިވަކި ފުލުހުންނަށް ޤާނޫނުގެ ދިގު އަތް ފޯރާނެ ކަމަށެވެ.
ކޮންތާކު އޮތް ބާރެއްގެ ދަށުންތޯ @PoliceMv އިން، ބަޔަކު މުޒާހަރާކޮށްލާއިރަށް ތިޔަ ރޫޅާލަނި؟ ޓީޝާޓް ބާލަން އަންގަނީ؟ އިނގިރޭސިން ނުލިޔެވޭނެކަމަށް ބުނަނީ؟ ކަށަވަރުކުރައްވާ، ކޮންމެ ޣައިރުޤާނޫނީ ޢަމަލަކަށް ޖަވާބުދާރީކުރުވޭނެ. ވަކިވަކި ފުލުހުންނަށް ޤާނޫނުގެ ދިގު އަތް ފޯރާނެ.
— Mohamed Jameel Ahmed (@MJameelAhmed) January 7, 2022
ޕީޕީއެމް ޕީއެންސީން މާލޭގައި އިއްޔަ ކުރިއަށް ގެންދިޔަ "އިންޑިއާ އައުޓް" މުޒާހަރާގެ ތެރެއިން 29 މީހުން ހައްޔަރުކޮށްފައިވާއިރު، އޭގެ ތެރެއިން ދެ މީހެއް ފިޔަވައި އެހެން އެންމެން ދޫކޮށްލާފައިވާކަމަށް ފުލުހުން ބުނެފައިވެއެވެ.
ބަންދުން ދޫކޮށްނުލި 2 މީހުންނަކީ ފުލުހުންނަށް ހަމަލާދީން ދެމީހުންކަމަށްވެސް ބުނެފައިވެއެވެ.