ރައީސް އިބްރާޙިމް މުހައްމަދު ސޯލިހް ކޮވިޑް-19 އަށް ޕޮޒިޓިވް ވެއްޖެއެވެ.
ރައީސް ސޯލިހް ކުރެއްވި ޓްވީޓެއްގައި ވިދާޅުވީ، އެމަނިކުފާނު ކޮވިޑް-19 އަށް ޕޮޒިޓިވް ވެފައިވަނީ އަތޮޅުތެރެއަށް ދަތުރުކުރުމަށް ރޭ ހެދި ޕީސީއާރް ޓެސްޓުން ކަމަށެވެ.
ކޮވިޑަށް ޕޮޒިޓިވް ނަމަވެސް ހާލު ރަނގަޅު ކަމަށާއި، އަދި މިވަގުތުހުރީ ގޭގައި އެކަހެރި ވެގެން ކަމަށް ވިދާޅުވިއެވެ.
އަޅުގަނޑު ކޮވިޑް 19 އަށް ޕޮޒިޓިވްވެއްޖެ، އެކަން އެނގުނީ އަތޮޅުތެރެއަށް ދަތުރުކުރުމަށް ރޭގަ ޕީސީއާރް ހެދުމުން. މާތް ﷲގެ ރަޙްމަތްފުޅުން ޙާލު ރަނގަޅު. މިވަގުތު މިހިރީ ގޭގައި އެކަހެރިވެގެން.
— Ibrahim Mohamed Solih (@ibusolih) January 22, 2022
ރައީސް ސޯލިހް އެންމެފަހުން ވަޑައިގެންނެވީ ދުބާއީ އަށެވެ. އަދި މިފަހުން ކޮމަންޑޫ ދާއިރާގެ ކެމްޕޭނަށް އެ ރަށަށް ވަޑައިގެންފައިވެއެވެ. އަދި އެމަނިކުފާނާއި ރައީސް ނަޝީދު މިއަދު ކޮމަންޑޫ ދާއިރާއަށް ވެސް ވަޑައިގަންނަވާގޮތަށް އޮތީ ހަމަޖެހިފައެވެ.