މިސަރުކާރުން ހިންގަމުންގެންދާ ކޮރަޕްޝަންގެ އަމަލުތައް ބެލޭނެގޮތެއްނެތް ކަމަށް ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެއްޖެއެވެ.
އުޝާމް މިފަދައިން ވިދާޅުވެފައިވަނީ ޑިފެންސް މިނިސްޓަރު މާރިޔާ އަހުމަދު ދީދީ އަށް ތުހުމަތުކުރެވޭ ކޮރަޕްޝަނެއް އޮތްނަމަ އެ މައްސަލައެއް އޭސީސީ އަށް ހުށަހެޅުމަށް އެކަމަނާ ގޮވާލައްވާފައިވަނިކޮށެވެ.
އެގޮތުން މާރިޔާ ކުރެއްވި ޓްވީޓަށް ރައްދު ދެއްވާ އުޝާމް ވިދާޅުވެފައިވަނީ، އެމްޑީޕީން ވަރަށް ރޭވުންތެރިކަމާއެކު މަޖިލިސް ރިސެސް ދުވަސްވަރު ދައުރުންބޭރު ޖަލްސާ ބާއްވައިގެން އޭސީސީ ޤާނޫނީ ހުސްކަމަކަށް ގެނެސްފައިވާކަމަށެވެ.
އޭސީސީއަށް މެމްބަރުން އައްޔަނު ކުރުން އަވަސް ކުރުމަށް ސަރުކާރުން ބޭނުން ނުވާކަމަށާއި، މިސަރުކާރުން ހިންގަމުންގެންދާ ކޮރަޕްޝަންގެ އަމަލުތައް ބެލޭނެގޮތެއްނެތް ކަމަށް އުޝާމްގެ ޓްވީޓްގައި ވިދާޅުވެފައިވެއެވެ.
MDPއިން ވަރަށް ރޭވުންތެރިކަމާއެކު މަޖިލިސް ރިސެސް ދުވަސްވަރު ދައުރުންބޭރު ޖަލްސާ ބާއްވައިގެން ACC މިއޮތީ ގާނޫނީހުސްކަމަކަށް ދުއްވާލާފަ. ACCއަށް މެންބަރުން އައްޔަންކުރުން އަވަސްކުރަން ސަރުކާރުން ބޭނުމެއްނުވޭ. މިސަރުކާރުން ހިންގަމުންގެންދާ ކޮރަޕްޝަންގެ އަމަލުތައް ބެލޭނެގޮތެއްނެތް. https://t.co/FrPOgPPP1E
— Ahmed Usham (@a_usham) January 25, 2022
އޭސީސީގެ މެމްބަރުން މަގާމުން އިސްތިއުފާ ދެއްވީ އެ މެމްބަރުންގެ ޕާސޯމަންސް އޮޑިޓެއް ހެދުމަށްފަހު މަގާމުން ދުރުކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާ، އެ މައްސަލަ ކުރިއަށް ގެންދަނިކޮށެވެ.
އޭސީސީގެ މެމްބަރުން ނެތި ބައި އިލެކްޝަނަކާ ކުރިމަތިލާން ޖެހިފައިވުމުން، އެކަމުގައި އެމްއެންޕީން އަދި އިދިކޮޅު ޕީޕީއެމް ޕީއެންސީން ވެސްވަނީ ކަންބޮޑުވުން ފާޅުކޮށްފައެވެ.