އެމްޑީޕީގެ ޗެއާޕާސަންގެ މަގާމަށް ވާދަކުރައްވާނެކަން އިކޮނޮމިކް މިނިސްޓަރު ފައްޔާޒް އިސްމާއިލް ރަސްމީކޮށް އިއުލާނުކޮށްފިއެވެ.
ފައްޔާޒް ކުރެއްވި ޓްވީޓެއްގައި މިކަން ރަސްމީކޮށް އިއުލާނުކުރެއްވިއިރު އިތުރަށް ވިދާޅުވެފައިވަނީ، އަމާޒަކީ ޕާޓީ އިތުރަށް ހަރުދަނާކޮށް، އެމްޑީޕީގެ ހެޔޮވެރިކަން ދެމެހެއްޓުން ކަމަށެވެ.
"ލޮބުވެތި މެމްބަރުންގެ ތާއީދަށް އެދެން." ފައްޔާޒްގެ ޓްވީޓްގައިވެއެވެ.
ފައްޔާޒްގެ ޓްވީޓްގައި އިތުރަށް ވިދާޅުވެފައިވަނީ، މި އިންތިހާބުގެ ސަބަބުން ޕާޓީ އިތުރަށް ހަރުދަނާވެގެން ދާނެކަމާމެދު ޝައްކެއް ނެތްކަމަށެވެ.
MDP ge chairperson kamuge magaamah kurimathi lumah nimmaifin. Amaazakee party ithurah harudhanaakoh, MDP ge heyo verikan dhemehettun. Lobuvethi memberunge thaaeedhah edhen. Mi inthikhaabu ge sababun party ithurah harudhanaa vegendhaane kamaamedhu shakkeiy neiy.
— Fayyaz Ismail (@faya_i) February 13, 2022
ފައްޔާޒްގެ އިތުރުން އެމްޑީޕީހެ ޗެއާޕާސަންގެ މަގާމަށް ވާދަކުރައްވާނެކަން ރައްޔިތުންގެ މަޖިލީހުގެ މާފަންނު މެދު ދާއިރާ މެމްބަރު އިމްތިޔާޒު ފަހްމީ (އިންތި)ވަނީ ހާމަކުރައްވާފައެވެ.
އެމްޑީޕީގެ ޗެއަރޕާސަން މަގާމާއި އަންހެނުންގެ ރޫހު، ޒުވާނުންގެ ހިއްވަރުގެ ރައީސް އަދި ނައިބް ރައީސް ކަމުގެ މަޤާމުގެ އިންތިހާބް ބޭއްވުމަށް ހަމަޖެހިފައިވަނީ އޭޕްރިލް 16 ވަނަ ދުވަހުއެވެ. އެ މަގާމުތަކަށް ކުރިމަތިލުމަށް ބޭނުންވާ ފަރާތްތަކަށް ކުރިމަތިލުމުގެ ފުރުސަތު ފެބްރުއަރީ 19 ވަނަ ދުވަހުގެ 16:00 އާހަމައަށް ހުޅުވާލާފައިވާ ކަމަށް އެމްޑީޕީން ބުނެފައިވެއެވެ.