ވަގުތީ ގޮތުން ރައީސުލް ޖުމްހޫރިއްޔާގެ މައްސޫލިއްޔަތުތަކާ ވާޖިބުތައް އަދާކުރެއްވުމަށްޓަކައި ރައީސުލް ޖުމްހޫރިއްޔާގެ ކަމުގެ ހުވާ ނައިބު ރައީސް ފައިސަލް ނަސީމް ދެންމެ ކުރައްވައިފި އެވެ.
ރައީސުލް ޖުމްހޫރިއްޔާގެ މައްސޫލިއްޔަތާއި ބާރުތައް ފައިސަލް ނަސީމްއާ ހަވާލުކުރެއްވީ ރައީސް އިބްރާހިމް މުހައްމަދު ސޯލިހް ޑޮކްޓަރުގެ ލަފާފުޅުގެ މަތިން ތައިރޮއިޑް ސާޖަރީއެއް ހެއްދެވުމަށް މިއަދު ނިންމަވާފައިވާތީ އެވެ.
ރައްޔިތުންގެ މަޖިލީހުގެ އިދާރާގައި މިއަދު ހެނދުނު ބޭއްވި ރަސްމިއްޔާތެއްގައި ފައިސަލަށް މަގާމުގެ ހުވާ ލައްވައި ދެއްވީ އުއްތަމަ ފަނޑިޔާރު އަހުމަދު މުއުތަސިމް އަދުނާނެވެ. ރައީސްގެ މައްސޫލިއްޔަތާ ހަވާލުވެވަޑައިގަތުމުގެ ގޮތުން މަގާމުގެ ހުވާ ފައިސަލް ކުރެއްވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކުރިފުޅުމަތީގަ އެވެ.
Vice President @FaisalNasym has taken the oath of office to assume duties of the President of the Republic of Maldives pic.twitter.com/8E5WQKtqfh
— People's Majlis (@mvpeoplesmajlis) February 25, 2022
ތައިރޮއިޑް ފަރުވާ އަކަށް ރައީސް ސޯލިހު ސާރޖަރީއަކަށް ސިންގަޕޫރަށް ފުރާވަޑައިގެންނެވީ މިދިޔަ ބުދަ ދުވަހު އެވެ. އެމަނިކުފާނު ރައީސުލް ޖުމްހޫރިއްޔާގެ މަގާމުގެ މައްސޫލިއްޔަތާ ބާރުތައް ނައިބު ރައީސާ ވަގުތީ ގޮތުން ހަވާލު ކުރެއްވީ ގާނޫނު އަސާސީގެ 123 ވަނަ މާއްދާގެ(ހ)ގައި ބަޔާންކޮށްފައިވާ ގޮތުގެ މަތިންނެވެ. މިއީ ރާއްޖޭގައި ރައީސްގެ މަސްއޫލިއްޔަތުތަކާ ނައިބު ރައީސް ހުވާކުރައްވައިގެން ހަވާލުވެވަޑައިގެންނެވި ފުރަތަމަ ފަހަރެވެ.
ނައިބު ރައީސް ފައިޞަލް ނަސީމް ރައީސުލްޖުމްހޫރިއްޔާގެ މަސްއޫލިއްޔަތުތަކާ ހަވާލުވެވަޑައިގަތުމަށް ހުވާ ކުރައްވައިފި pic.twitter.com/dYDFUxXUoC
— People's Majlis (@mvpeoplesmajlis) February 25, 2022
ގާނޫނު އަސާސީގެ 123 ވަނަ މާއްދާގެ(ހ)ގައި ބުނެފައިވަނީ ރައީސުލްޖުމްހޫރިއްޔާއަށް އޭނާގެ މަޤާމުގެ މަސްއޫލިއްޔަތުތަކާއިވާޖިބުތައް އަދާކުރުމަށް ވަގުތީގޮތުން ޢުޛުރުވެރިވެއްޖެކަމަށް ޤަބޫލުކުރެވިއްޖެނަމަ، އެކަން ރައްޔިތުންގެ މަޖިލީހުގެ ރައީސަށް ލިޔުމަކުން އެންގުމަށްފަހު ރައީސުލްޖުމްހޫރިއްޔާގެ މަސްއޫލިއްޔަތުތަކާއި ވާޖިބުތައް އަދާކުރުމަށް ރައީސުލްޖުމްހޫރިއްޔާގެ ނައިބާ ޙަވާލުކުރާންވާނެއެވެ. އަދި، ރައީސުލްޖުމްހޫރިއްޔާ އޭނާގެ މަޤާމުގެ މަސްއޫލިއްޔަތު އަދާކުރުމަށް އަލުން ޙަވާލުވާންވާނީ އެކަން ރައްޔިތުންގެ މަޖިލީހުގެ ރައީސަށް ލިޔުމަކުން އެންގުމަށްފަހުގައެވެ.
ރައީސް ރޭ ކުރެއްވި ޓްވީޓެއްގައި ވިދާޅުވީ ޑޮކްޓަރުގެ ލަފާފުޅުގެ މަތިން ތައިރޮއިޑް ސާޖަރީއެއް ހެއްދުމަށް ނިންމަވާފައިވާ ކަމަށެވެ. އަދި ސާޖަރީގެ ކަންކަން ހިނގަމުންދާ ވަގުތު މަގާމުގެ މަސްއޫލިއްޔަތުތައް ވަގުތީ ގޮތުން ނައިބު ރައީސް ފައިސަލް ނަސީމު އަދާކުރައްވާނެ ކަމަށް ރައީސް ވިދާޅުވި އެވެ. އަދި އެކަން މަޖިލީހުގެ ރައީސްއާ ހިއްސާ ކުރައްވާނެ ކަމަށްވެސް ވިދާޅުވި އެވެ.
Following advice from my doctors, I’m scheduled to undergo surgery on my thyroid this morning. I will formally notify Speaker of @mvpeoplesmajlis and VP @FaisalNasym will temporarily assume my duties for the duration of my surgery. I look forward to returning to work shortly. IA.
— Ibrahim Mohamed Solih (@ibusolih) February 24, 2022
ރައީސް ވަނީ ލަސްނުވެ މަސައްކަތަށް އެނބުރި އައުމަށް އުއްމީދު ކުރައްވާ ކަމަށްވެސް ވިދާޅުވެފަ އެވެ.
ރައީސް ޞާލިޙް، އެމަނިކުފާނުގެ މަޤާމުގެ މަސްއޫލިއްޔަތުތަކާއި ވާޖިބުތައް އަދާކުރެއްވުމަށް ވަގުތީގޮތުން ޢުޛުރުވެރިވެޑައިގަންނަވާ ޙާލަތެއް މެދުވެރިވެފައިވާތީ ރައީސުލްޖުމްހޫރިއްޔާގެ މަސްއޫލިއްޔަތުތައް ވަގުތީގޮތުން ރައީސުލްޖުމްހޫރިއްޔާގެ ނައިބު ފައިޞަލް ނަސީމާ ހަވާލު ކުރައްވާފައިވާ ރައީސްކަމުގެ ހުވާ ފައިސަލް ކުރައްވާފައިވާކަން ރައީސް އޮފީހުންވެސް ވަނީ ހާމަ ކުރައްވާފަ އެެވެ.