ސޯޝަލް މީޑިއާ ޕްލެޓްފޯމެއްގެ ގޮތުގައި މިހާރު އެންމެ މަގުބޫލު ޓިކްޓޮކުން 10 މިނިޓްގެ ވީޑިއޯ ލެވޭ ގޮތަށް ހަދައިފި އެވެ.
ޗައިނާގެ ބައިޓްޑާންސުން ހިންގާ މި އެޕަކީ އެންމެ ފުރަތަމަ 15 ސިކުންތުގެ ވީޑިއޯ އަޕްލޯޑްކުރަން ހާއްސަ އެއްޗެކެވެ. އެކަމަކު ހާއްސަކޮށް އެ ބޭނުންކުރާ ކްރިއޭޓަރުންގެ އެދުމުގެ މަތިން ބަދަލުތަކެއް ގެންނަމުން އައިސް މިދިޔަ އަހަރުގެ ޖުލައިގެ ތެރޭގައި ތިން މިނިޓްގެ ވީޑިއޯ ލެވޭ ގޮތަށް ވެސް ހެދި އެވެ.
އެއަށް ފަހު މިހާރު މިއޮތީ އޭގެ ތިންގުނަ އަށް ވުރެ ދިގުކޮށް ވީޑިއޯ އަޕްލޯޑްކުރެވޭނެ ފުރުސަތު ފަހިކޮށް ދީފަ އެވެ. ޓިކްޓޮކުން ބުނި ގޮތުގައި މި ބަދަލާ އެކު ކޮންޓެންޓްތައް އިތުރަށް މުއްސަނދިވެ، ކްރިއޭޓަރުންގެ އުފެއްދުންތެރިކަން ވެސް އިތުރުވާނެ އެވެ.
TikTok creeping in on YouTube territory
I can now upload videos up to 10 minutes long pic.twitter.com/P2Mbf4ygWV
— Matt Navarra (@MattNavarra) February 28, 2022
އަލަށް މި ގެނައި ބަދަލަށް ބަލާ އިރު މިއީ ކެއްކުމާ ބެހޭ ޑެމޯތަކާއި އެޑިއުކޭޝަނަލް ކޮންޓެންޓްތަކާއި ބިއުޓީ ޓިއުޓޯރިއަލްގެ އިތުރުން ކޮމެޑިކް ސްކެޗް ފަދަ އެއްޗެހި ގެނެސްދޭ ކްރިއޭޓަރުން ފަދަ މީސްމީހުންނަށް އެ މީހުންގެ ކޮންޓެންޓް އިތުރަށް ވަރުގަދަކުރަން ލިބުނު ފުރުސަތަކަށް ވާނެ އެވެ.
ޓިކްޓޮކަށް އަޕްލޯޑްކުރެވޭ ވީޑިއޯގެ ދިގުމިނަށް ގެނައި މި ބަދަލާ އެކު، ދެން ޔޫޓިއުބަށް އަނެއްކާ ވެސް ބޮޑު ވާދަވެރިކަމެއް ކުރިމަތިވާނެ އެވެ. ފޭސްބުކް ވެސް ހިންގާ މެޓަގެ އިންސްޓަގްރާމަކީ ވެސް ޓިކްޓޮކާ ވަރަށް ވާދަކުރަން އުޅޭ ޕްލެޓްފޯމެކެވެ. އިންސްޓަގްރާމްގެ "ރީލްސް" އަކީ ޓިކްޓޮކް ނަކަލެކެވެ.
ޓިކްޓޮކް ބޭނުންކުރާ މީހުންގެ އަދަދު 2.91 ބިލިއަނަށް އަރަ އެވެ. މިދިޔަ އަހަރު ވެސް އެއަށް އާމްދަނީގެ ގޮތުގައި 28.8 ބިލިއަން ޑޮލަރު ލިބުނެވެ.