އައްޑޫ ސިޓީގެ ބިން ހިއްކުން ހުއްޓުވުމުގެ އަޑީގައި ތިބި މީހުން އެކަމުގެ ހިތި ނަތީޖާއާ ކުރިމަތިލާންޖެހޭނެ ކަމަށް ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެ އެވެ.
ނިހާދު މިހެން ވިދާޅުވީ އައްޑޫ ބިން ހިއްކުމުގެ މަޝްރޫއާ މެދު ހުރި ކަންބޮޑުވުންތައް ރައްޔިތުންގެ މަޖިލީހުގެ އެންވަޔަރަމެންޓް އެންޑް ކްލައިމެޓް ޗޭންޖު ކޮމިޓީ އާއި ހިއުމަން ރައިޓްސް ކޮމިޓީން ބަލައިދޭން އެދި ހަތް ޖަމިއްޔާއަކުން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ސިޓީއެއް ފޮނުވާފައިވާ ދަނޑިވަޅެއްގަ އެވެ.
އެކަމާ ގުޅިގެން ނިހާދު ވިދާޅުވީ އައްޑޫ ބިން ހިއްކުން ހުއްޓުވަން ކުރާ މަސައްކަތަކީ އައްޑޫގެ 99 އިންސައްތަ ރައްޔިތުންނާއި ދެކޮޅަށް ކުރާ ކަމެއް ކަމަށާއި އައްޑޫ ބިން ހިއްކުމުގެ މަޝްރޫއު ހުއްޓުވުމުގެ އަޑީގައިވާ މީހުންނަށް އެކަމުގެ ހިތި ނަތީޖާއާއި ކުރިމަތިލާންޖެހޭނެ ކަމަށެވެ.
"އައްޑޫގެ ތަރައްގީ އަށް ހުރަސް އަޅާ ކޮންމެ މީހަކަށް ނަފުރަތު ކުރަން. އެފަދަ އަމަލުތައް ހުއްޓާލުމަށް ގޮވާލަން." ނިހާދު ވިދާޅުވި އެވެ.
އައްޑޫގެ ބިން ހިއްކުމާ ގުޅޭ ގޮތުން އެ ޖަމިއްޔާތަކުން މިދިޔަ ހަފުތާގެ ބުރާސްފަތި ދުވަހު ނަޝީދަށް ފޮނުވި ސިޓީގައި ވަނީ ބިން ހިއްކައިފި ނަމަ ލިބިދާނެ ގެއްލުންތަކާއި މި މަޝްރޫއު ސަރުކާރުން ކުރިއަށް ގެންދަން ރާވާފައިވާ ގޮތާ މެދު ހުރު ކަންބޮޑުވުންތައް ވެސް ހިއްސާކޮށްފަ އެވެ.
އިންޑިއާގެ އެގްޒިމް ބޭންކްގެ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން އައްޑޫ ބިން ހިއްކަން މިދިޔަ މަހުގެ 27 ގައި ސަރުކާރުން ހަވާލުކުރީ ނެދަލޭންޑްސްގެ ވެން އޫޑް އެވެ. އިއްޔެ ރައްޔިތުންގެ މަޖިލީހުގައި ޕްލޭނިން މިނިސްޓަރު މުހައްމަދު އަސްލަމް ވިދާޅުވީ ބިން ހިއްކުމުގެ އަމަލީ މަސައްކަތް ފެށޭނީ ހަތަރު ވަރަކަށް މަސް ފަހުން ކަމަށެވެ. އަދި އޭގެ ކުރިން ވާން ޖެހޭ ތައްޔާރީތައް މިހާރު ވެސް ކުރިއަށްދާ ކަމަށް ވިދާޅުވި އެވެ.
#AdduCity ge Bin hikkun huttuvan kuraa masakkathakee Addu ge 99% rayyithunnaai dhekolhah kuraa kameh! Mikamuge adeegai vaa meehun meege hithi natheejaa aai kurimathi laan jeheyne!
Addu ge tharaggee ah huras alhaa konme meehakah nafarathu kuran! Efadha amalu huttaalumah govaalan! https://t.co/3BRzFqkqGP— Feydhoo Meehaa (Mohamed Nihad) (@nihad_m) April 7, 2022
އައްޑޫ ބިން ހިއްކުން ހުއްޓުވަން އަމިއްލަ ފަރާތަކުން މީދޫ މެޖިސްޓްރޭޓް ކޯޓަށް ވެސް ހުށަހަޅާފައިވެ އެވެ. ސަރުކާރުން ބުނެފައި ވަނީ ބިން ހިއްކާނީ ވީހާ ވެސް ބޮޑަށް ގެއްލުން ކުޑަވާނެ ގޮތްތަކަޑް ބަލައިގެން ކަމަށެވެ. މި މަޝްރޫއުގެ އެންވަޔަރަމަންޓް އިމްޕެކްޓް އެސެސްމަންޓް (އޭއައިއޭ) އޮތީ އެންވަޔަރަމަންޓް ޕްރޮޓެކްޝަން އޭޖެންސީ (އީޕީއޭ) އަށް ހުށަހަޅައިފަ އެވެ.
އައްޑޫގެ ބިން ހިއްކުމާ ގުޅޭ މުހިއްމު ބައެއް ކަންކަން:
* ޖުމްލަ 194.3 ހެކްޓަރުގެ ބިން ހިއްކާނެ
* ހިތަދޫން 90 ހެކްޓަރުގެ ބިން ހިއްކާނެ
* ހުޅުމީދޫން 23.3 ހެކްޓަރުގެ ބިން ހިއްކުމާއި ޓޫރިޒަމަށް ހާއްސަކޮށްގެން ފަސް ހެކްޓަރުގެ ދެ ރަށް ހިއްކުން
* މަރަދޫ/މަރަދޫފޭދޫން 76 ހެކްޓަރުގެ ބިން ހިއްކާނެ
* ޓޫރިޒަމަށް ހާއްސަކޮށްގެން ފަޅުތެރެއިން ހިއްކައިގެން އުފައްދާ 8.3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކުން
* މަޝްރޫއަށް 1.3 ބިލިއަން ރުފިޔާ ހޭދަވާނެ