މާލެ އަތޮޅުގެ އެމްޑީޕީގެ ހަރަކާތްތައް އިތުރަށް ހިންގާލަންޖެހޭ ކަމަށް އެމްޑީޕީ ޗެއާޕާސަން އިންތިހާބުގައި ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެއެވެ.
މާލެ އަތޮޅުގެ ރަށްތަކަށް ކެމްޕޭނަށް ކުރެއްވި ދަތުރުފުޅަށްފަހު ކުރެއްވި ޓްވީޓެއްގައި ފައްޔާޒް ވިދާޅުވީ، މާލެ އަތޮޅު އެމް.ޑީ.ޕީގެ ހަރަކާތްތައް އިތުރަށް ހިންގާ ޕާޓީގެ މެންބަރޝިޕް އިތުރު ކުރަންޖެހޭކަން ރަށްތަކަށް ދެވުމުން ވަރަށް ސާފުކޮށް މެންބަރުން ބުނެފައިވާކަމަށެވެ.
"މިއަތޮޅަކީ އިޤްތިޞާދީ ގޮތުން ވަރުގަދަ އަތޮޅެއް. މާލެ އަތޮޅު މާބޮޑަށްވެސް ހިންގާލަން ޖެހޭ" ފައްޔާޒްގެ ޓްވީޓްގައިވެއެވެ.
މާލެ އަތޮޅު އެމް.ޑީ.ޕީގެ ހަރަކާތްތައް އިތުރަށް ހިންގާ ޕާޓީގެ މެންބަރޝިޕް ޑްރައިވް ކުރަންޖެހޭކަން މިއަތޮޅުގެ ރަށްތަކަށް ދެވުމުން ވަރަށް ސާފުކޮށް މެންބަރުން ދަންނަވައިފި. މިއަތޮޅަކީ އިޤްތިޞާދީ ގޮތުން ވަރުގަދަ އަތޮޅެއް. މާލެ އަތޮޅު މާބޮޑަށްވެސް އަޅުގަނޑުމެން #MDPHingaalan ޖެހޭ
— Fayyaz Ismail (@faya_i) April 15, 2022
އެމްޑީޕީގެ ޗެއާޕާސަންގެ އިންތިހާބަށް ފައްޔާޒް ވާދަކުރައްވާއިރު، ދެން އެމަގާމަށް ކުރިމަތިލައްވާފައިވަނީ މެމްބަރު އިމްތިޔާޒް ފަހުމީ (އިންތި)އެވެ.
އިންތި ވެސް އަންނަނީ ކެމްޕޭން ހަރަކާތްތައް އެކި ރަށްރަށުގައި ކުރިއަށް ގެންދަމުންނެވެ. އެގޮތުން މިވަގުތު އިންތި ކެމްޕޭނަށް ލ. އަތޮޅުގައި އަންނަނީ ހަރަކާތްތެރިވަމުންނެވެ.