ކުރީގެ ރައީސް މުހައްމަދު ނަޝީދަށް މިހާރު އޮތީ ރައީސް އިބްރާހީމް މުހައްމަދު ސޯލިހު ކުނިކޮށްފައި އެއްލައްވާލައްވާ ބަތްސުވާކޮޅުގައި ހިފުން ކަމަށް ވިދާޅުވެ ނަޝީދަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ފާޑު ވިދާޅުވެއްޖެ އެވެ.
އޭނަ މިއަދު ކުރެއްވި ޓްވީޓެއްގައި ވިދާޅުވީ މިދިޔަ ހޮނިހިރު ދުވަހު އެމްޑީޕީގެ އިންތިހާބުގައި ޗެއާޕާސަންގެ މަގާމަށް ނަޝީދުގެ ތާއީދާ އެކު ވާދަކުރެއްވި އިމްތިޔާޒް ފަހުމީ އިންތި) އަށް ކާމިޔާބުނުވުމަކީ ނަޝީދަށް މިހާރު އިތުބާރެއް ވެސް ނެތްކަމުގެ ނަތީޖާ ކަމަށެވެ.
"މި ފަހަރު ކާމިޔާބުވި ނަމަ ނަޝީދު ފެންނާނީ ޖަލުން." ޖަމީލު ވިދާޅުވި އެވެ.
އެމްޑީޕީގެ އިންތިޚާބު އިންތިއަކަށް ނުގެއްލޭ.އެއީ ނަޝީދާއި ޞާލިޙް ބޭރުގެ ބާރުގެ ކުަރިމަތީގައި ކުޑަކަކޫޖަހައި ސިޔާސަތުގައި އެމީހުންގެ އިތުބާރުވެސް ނަޝީދަށް ނެތުމުގެ ނަތީޖާ.މިފަހަރު ކާމިޔާބުވިނަމަނަޝީދު ފެންނާނީ ޖަލުން.ނަޝީދަށް އޮތީ ޞާލިޙް ކުނިކޮށްފައި އެއްލާލާ ބައްސުވާކޮޅު ހިފުން. pic.twitter.com/G8OpAn1YT1
— Mohamed Jameel Ahmed (@MJameelAhmed) May 18, 2022
އޭނާ ވިދާޅުވީ ހަގީގަތުގައި އިންތި އަށް އިންތިހާބު ނުގެއްލޭ ކަމަށާއި އެއީ ނަޝީދާއި ރައީސް ސޯލިހު ބޭރުގެ ބާރުގެ ކުރިމަތީގައި ކުޑަކަކޫ ޖަހައި ސިޔާސަތުގައި އެ މީހުންގެ އިތުބާރު ވެސް ނަޝީދަށް ނެތުމުގެ ނަތީޖާ ކަމަށެވެ.
ޗެއާޕާސަންގެ އިންތިހާބުގައި އިންތިއާ ވާދަކޮށް ބޮޑު ތަފާތަކުން ކާމިޔާބުކުރެއްވީ ރައީސް ސޯލީހުގެ ތާއީދާ އެކު ބޮޑު ތަފާތަކުން އިކޮނޮމިކް މިނިސްޓަރު ފައްޔާޒް އިސްމާއީލެވެ.