މިއަދު ހެނދުނު ގަލޮޅުދަނޑަށް ވަދެ ޔޯގާ އިވެންޓަށް ހުރަސް އެޅާ ހަމަލާދިން މައްސަލަ ސީރިއަށް މައްސަލައެއްގެ ގޮތުގައި ބަލާނެ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ރައީސް ސޯލިހް ކުރެއްވި ޓްވީޓެއްގައި ވިދާޅުވީ ގަލޮޅު ދަނޑަށް ބަޔަކު ވަދެގަނެ ހިންގި ކަންތައް ފުލުހުން ތަހުގީގު ކުރަމުން އަންނަ ކަމަށެވެ.
އަދި މިމައްސަލައަކީ ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށާއި މިކަމުގައި ޒިންމާވާ ފަރާތްތައް ޤާނޫނުގެ ކުރިމައްޗަށް ވަރަށް އަވަހަށް ގެންނާނެ ކަމަށް ރައީސް ސޯލިހް ވިދާޅުވިއެވެ.
An investigation has been launched by @PoliceMv into the incident that happened this morning at Galolhu stadium.
This is being treated as a matter of serious concern and those responsible will be swiftly brought before the law.
— Ibrahim Mohamed Solih (@ibusolih) June 21, 2022
މިއަދު ފާހަގަކުރާ މި އަހަރުގެ ބައިނަލްއަގްވާމީ ދުވަހާ ގުޅިގެން ގަލޮޅު ދަނޑުގައި ޔޯގާ ހެދުން ކުރިއަށް ގެންދަނިކޮށް ބަޔަކު އެތަނަށް ގަދަކަމުން ވަދެގަނެ، އެތަނުގައި ހުރި ދިވެހި އަދި އިންޑިއާގެ ގައުމީ ދިދަތަކަށާއި، މީހުންގެ ތަކެއްޗަށް ގެއްލުންދީ މީހުންނަށް ހަމަލާދީފައިވެއެވެ.
ޔޯގާ އިވެންޓާއި ދެކޮޅަށް މުޒާހަރާ ކޮށްފައިވާއިރު އެކަމުގައި އިދިކޮޅަށް ނިސްބަތްވާ ފަރާތްތަކުންވެސް ބައިވެރިވެފައިވެއެވެ. ފުލުހުން ބުނެފައިވަނި މިމައްސަލައިގައި 6 މީހަކު ހައްޔަރު ކޮށްފައިވާކަމަށެވެ.
2014 ވަނަ އަހަރުން ފެށިގެން ރާއްޖޭގައި ޔޯގާ ދުވަސް ފާހަގަކުރަމުން އަންނައިރު، އޭރު މި ހަރަކާތް ހުއްޓުވުމަށް ބަޔަކު އުޅެފައި ނުވާތީ މިފަހަރުގެ މި އަމަލަކީ ސިޔާސީ ކަމެއްގެ ގޮތުގައި އަންނަނީ ސިފަ ކުރަމުންނެވެ.