ދީނީ އިލްމުވެރިންނާ މެދު ވެސް އަދުލުވެރިކޮށް ކަންތައް ކުރުމަށް ސަރުކާރަށް ކުރީގެ ރައީސް ޑރ. މުހައްމަދު ވަހީދު ހަސަން މަނިކު އިލްތިމާސްކުރައްވައިފި އެވެ.
މިދިޔަ އަންގާރަ ދުވަހު ހެނދުނު މާލޭގައި ބޭއްވި ޔޯގާ އިވެންޓަކާ ގުޅިގެން ހިނގައިދިޔަ ހަމަނުޖެހުންތަކުގެ ތަހުގީގަށް ރާއްޖޭގެ ދީނީ އިލްމުވެރިންތަކެއް ވެސް ހައްޔަރުކޮށްފައި ވަނިކޮށް ވަހީދު ކުރެއްވި ޓްވީޓެއްގައި ވިދާޅުވީ އެ ބޭފުޅުންނަކީ ވެސް ދިވެހި ރައްޔިތުން ކަމަށާއި ގާނޫނާ އެއްގޮތަށް އަދުލުވެރިކަމާ އެ މީހުންނާ މެދު އަމަލުކުރަން ޖެހޭނެ ކަމަށެވެ.
ދީނީ އިލްމުވެރިންނަކީވެސް ދިވެހިރައްޔިތުން. ޤާނޫނާއެއްގޮތަށް ޢަދުލްވެރިކަމާއެކު އެބޭފުޅުންނާ މެދު އަމަލުކުރެއްވުމަށް އިލްތިމާސް ކުރަން. @ibusolih @ProgressPartyMV @PoliceMv
— Mohamed Waheed (@DrWaheedH) June 24, 2022
ބައިނަލްއަގްވާމީ ޔޯގާ ދުވަސް ރާއްޖޭގައި ފާހަގަކުރަން މާލޭގެ ގަލޮޅު ދަނޑުގައި ބޭއްވި އިވެންޓްގެ ތެރެއަށް ބަޔަކު ވަދެ ހިންގި ހަމަނުޖެހުންތަކާ ގުޅިގެން މިހާތަނަށް 15 މީހަކު ހައްޔަރުކޮށްފައިވާ އިރު، އޭގެ ތެރޭގައި ހިމެނޭ ދެ ޝައިހުންނަކީ ޝައިހް ފަޒްލޫން މުހައްމަދާއި ޝައިހް އާދަމް ނިޝާނެވެ.
އެ ބޭފުޅުންގެ މައްޗަށް ކުރެވުނު ތުހުމަތާ ގުޅިގެން ހައްޔަރުކުރުމުން އިސްލާމިކް މިނިސްޓްރީން ވަނީ ދީނީ ދަރުސް ދިނުމަށް ދޫކޮށްފައި އޮތް ހުއްދަ ވެސް ބާތިލުކޮށްފަ އެވެ.