އަދާލަތު ޕާޓީގެ އިލްމުވެރިންނަށް ވުރެ ބޮޑަށް އިސްލާމްދީނަށް ހިދުމަތް ކުރި ބަޔަކު ރާއްޖޭގައި ނެތް ކަމަށް އަދާލަތުގެ ރައީސް އަދި ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
އިމްރާން މިރޭ ކުރެއްވި ޓްވީޓެއްގައި ވިދާޅުވީ ބަޔަކަށް ގަބޫލު ކުރެވުނަސް، ނުކުރެވުނަސް ވޭތުވެދިޔަ ތިން އަހަރާއި ބަޔަށް ބެލިޔަސް ނޫނީ 2005 އިން ފެށިގެން މިހާތަނަށް ބެލިޔަސް އަދާލަތުގެ އިލްމުވެރިންނަށް ވުރެ ބޮޑަށް ދީނަށް ހިދުމަތް ކުރި ޕާޓީއެއް ވެސް ނުވަތަ ޖަމާއަތެއް ވެސް ރާއްޖޭގައި ނެތްކަމީ ހަގީގަތެއް ކަމަށެވެ.
Haqeegathakee,Bayakah gaboolu kurevunas,nukurevunas veythuvedhiya 3 aharaa bayah beliyas noonee 2005 in feshigen mihaathanah beliyas Adhaalath ge ilmuverinnah vure bodah dheenah khidhumaiy kuri party eh viyas nuvatha jamaa’atheh viyas mi raajjeygai neiykan.
— Imran Abdulla (@ShimranAb) July 13, 2022
އިމްރާން މިހެން ވިދާޅުވެފައިމިވަނީ ލިވާތުކުރާ މީހުން ނުވަތަ އެއްޖިންސުން ގުޅުން ހިންގާ މީހުންނާއި ދެކޮޅަށް އަދާލަތު ޕާޓީ ވެސް ހިމެނޭ ސަރުކާރުން ފިޔަވަޅު ނާޅާތީ އެ ޕާޓީ އަށް ބޮޑެތި ފާޑުކިޔުންތަކެއް އަމާޒުވަމުންދާ ދަނޑިވަޅެއްގަ އެވެ.
އެއްޖިންސުން ގުޅުން ހިންގުމުގެ ބޮޑެތި މައްސަލަތައް ފެންމަތިވަމުންދާ އިރު، އެފަދަ އަމަލު ހިންގާ މަންޒަރު ފެންނަ ތިން ވީޑިއޯއަކާއި ގްރޫޕް ހަދައިގެން ޖިންސީ ގުޅުން ހިންގާ ކަމަށް ބެލެވޭ މަންޒަރުތަކެއް ފެންނަ ފޮޓޯތަކެއް ދާދިފަހުން ވަނީ ސޯޝަލް މީޑިއާގައި އާންމުވެފައިވެ އެވެ.
އާންމުވި އެއްޗެހިން ފެންނަނީ ސިޔާސީ ގޮތުން ނުފޫޒު ގަދަ ބަޔަކާއި އެފަދަ މީހުންނާ ގުޅުން އޮންނަ ބައެކެވެ.
ރާއްޖެ އަކީ ސައްތައިން ސައްތަ އިސްލާމީ ގައުމަކަށް ވިޔަސް ރާއްޖޭގައި ފަހަކަށް އައިސް ދީނާ ހިލާފު އަމަލެއް ވަރަށް ފާޅުގައި ކުރުން އާންމުވެފައިވެ އެވެ. މިކަމާ ގުޅިގެން ވަރަށް ގިނަ ބަޔަކު ދަނީ ކަންބޮޑުވުން ވެސް ފާޅުކުރަމުންނެވެ. ހާއްސަކޮށް ދީނީ އިލްމުވެރިން އަންނަނީ ގައުމުގެ މިހާރު އޮތް ހާލަތާ މެދު އިންތިހާ އަށް ކަންބޮޑުވުން ފާޅުކުރަމުންނެވެ.