އިއްޔެ ރޭ ފިއްލަވައިގެން ރާއްޖެ ވަޑައިގެންނެވި ސްރީ ލަންކާގެ ރައީސް ގޮޓަބަޔާ ރާޖަޕަކްސާ ބަލައި ޕްރައިވެޓް ޖެޓެއް ރާއްޖެ އަށް މިއަދު އަތުވެއްޖެ ކަމަށް މީޑިއާތަކުން ބުނެފި އެވެ.
ލަންކާގެ މަޝްހޫރު ނޫސްވެރިއެއް ކަމަށްވާ ޑެއިލީ މިރާގެ ޑެޕިއުޓީ އެޑިޓަރު ޖަމީލަ ހުސައިން ކުރެއްވި ޓްވީޓެއްގައި ވެސް ވިދާޅުވި އެ ޖެޓްގައި ގޮޓަބަޔާ ވަރަށް އަވަހަށް ސިންގަޕޫރަށް ފުރާވަޑައިގަންނަވާނެ ކަމަށެވެ. ގޮޓަބަޔާ އާއި އަނބިކަނބަލުން ފިއްލަވައިގެން އަސްކަރީ ޖެޓެއްގައި ރާއްޖެ ވަޑައިގެންނެވީ އިއްޔެ ރޭ މެންދަމު އެވެ.
A private jet lands in Maldives. Gotabaya Rajapaksa all set to depart Maldives in a short while for Singapore, journalists on ground say. #SriLanka #Maldives
— Jamila Husain (@Jamz5251) July 14, 2022
އެ ބޭފުޅުން މިހާރު ތިއްބެވީ އިތާފުށި ރިސޯޓްގަ އެވެ.
ގޮޓަބަޔާ ފިއްލަވައިގެން ރާއްޖެ ވަޑައިގެންނެވީ އިއްޔެ މަގާމުން އިސްތިއުފާ ވެސް ދެއްވަން ހަމަޖެހިފައި ވަނިކޮށެވެ. އޭނާ އިސްތިއުފާގެ ސިޓީގައި ސޮއިކުރެއްވި ނަމަވެސް އަދިވެސް ރަސްމީކޮށް އިސްތިއުފާއެއް ނުދެއްވަ އެވެ. އަދި ގޮޓަބަޔާ ފިއްލެވުމާ އެކީ ލަންކާގެ މަސްރަހު މިހާރު އޮތީ ވަރަށް ބޮޑަށް ހޫނުވެފަ އެވެ.
ވަގުތީ ރައީސެއްގެ ޒިންމާ މިހާރު އަދާކުރައްވަނީ ބޮޑުވަޒީރަކަށް ހުންނެވި ރަނިލް ވިކްރަމަސިންހަ އެވެ. ލަންކާގެ ރައްޔިތުން ގޮވަނީ ގޮޓަބަޔާ އާއި ރަނިލް ވެސް މަގާމުތައް ދޫކޮށްލުމަށެވެ.