ރާއްޖޭގައި ފާއިތުވި މަހެއްހާ ދުވަހުގެ ތެރޭގައި ހިނގައި ދިޔަ ބޮޑެތި އެއްވެސް ކަމަކާ ބެހޭ ގޮތުން ބަސްފުޅެއް ވިދާޅުނުވެ، ރައީސް އިބްރާހީމް މުހައްމަދު ސޯލިހު ހުންނެވީ "ހައްޕު" ކިޔުއްވައިގެން ކަމަށް މި ސަރުކާރުގެ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެ އެވެ.
މި މަހުގެ 8 ގައި ފާހަގަކުރި ބޮޑު އީދުގެ ތަހުނިޔާކިޔަން ކުރެއްވި ޓްވީޓްގެ ފަހުން އެއްވެސް ޓްވީޓެއް ވެސް ކުރައްވާފައިވާ ނުވާތީ ރައީސްގެ ޓްވިޓާ އެކައުންޓްގެ ސްކްރީންޝޮޓަކާ އެކު އޭނާ ވިދާޅުވީ ޑިމޮކްރަސީ އަކީ ރައްޔިތުންނަށް ވެރިމީހާގެ ބަސް އިވޭ އަދި ހާލަތު ސާފުވާ ނިޒާމެއް ކަމަށެވެ. އެކަމަކު ރާއްޖޭގެ ރައީސް ރާއްޖޭގައި މި ފަހުން ހިނގި އެއްވެސް ކަމަކާ ބެހޭ ގޮތުން އެއްޗެއް ވިދާޅުނުވާކަން މަލީހު ވަނީ ލިސްޓަކުން ހިއްސާކުރައްވައިފަ އެވެ.
ޑިމޮކްރަސީއަކީ ރައްޔިތުންނަށް ވެރިމީހާގެ ބަސް އިވޭ އަދި ހާލަތު ސާފުވާ ނިޒާމް.
1. ދީނީ ޢާލިމުން ޖަލުގައި
2. ލިވާތުގެ ހުތުރު ޢަމަލު
3. މަސްދަރު ހާމަކުރާ ޤާނޫނު
4. ޤައުމުގެ ދަރަނި
5. ތެލުގެ އަގު
6. ތަކެތީގެ އަގު
7. ސަރުކާރުގެ އިސްރާފު
8 ޖުލައިން ފެށިގެން ހައްޕު! pic.twitter.com/HPcqsEfOz4— Mohamed Maleeh Jamal (@maleehjamal) July 16, 2022
އެ ލިސްޓްގައިވާ ކަމްކަމުގެ ތެރޭގައި ހިމެނެނީ މިދިޔަ މަހުގެ 21 ގައި މާލޭގައި ޔޯގާ ދުވަސް ފާހަގަކުރަން ބޭއްވި އިވެންޓާ ދިމާކޮށް ހިނގި ހަމަނުޖެހުންތަކާ ގުޅިގެން "ބޭއިންސާފުން" ދެ ދީނީ އިލްމުވެރިޔަކު ހައްޔަރުކޮށްފައިވުމާއި އެއްޖިންސުން ގުޅުން ހިންގުމުގެ އަމަލުތަކާއި މަސްދަރު ހާމަކުރަން މަޖުބޫރުވާ ގޮތަށް ފާސްކުރި ހެއްކާ ބެހޭ ބިލުގެ މައްސަލަ އާއި ގައުމުގެ ދަރަނި ބޮޑުވަމުން ދިއުމާއި ތެލާއި ތަކެތީގެ އަގު އުފުލެމުން ދިއުމާއި ސަރުކާރުގެ އިސްރާފު ހަރަދުތަކެވެ.
ބަރަކާތްތެރި އަޟްޙާ ޢީދުގެ ހެޔޮ އެދުންތަކާއި ތަހުނިޔާ ދިވެހި ލޮބުވެތި ރައްޔިތުންނަށް އިޚްލާޞްތެރިކަމާއެކު އަރިސްކުރަން. އަދި، ޙައްޖުގެ މަތިވެރި އަޅުކަމުގައި ބައިވެރިވާ އެންމެހައި މުސްލިމުންނަށް، މަބްރޫރު ޙައްޖެއް މިންވަރުކުރެއްވުން އެދި މާތް اللهُ ގެ ޙަޟްރަތުގައި ދުޢާ ދަންނަވަން. pic.twitter.com/Oo6zaaDpO5
— Ibrahim Mohamed Solih (@ibusolih) July 8, 2022
މަލީހު ވިދާޅުވި ގޮތުގައި މިއިން އެއްވެސް ކަމަކާ ބެހޭ ގޮތުން އެއްޗެއް ވިދާޅުނުވެ ރައީސް ހުންނެނީ "ޖުލައި 8 ފެށިގެން ހައްޕުގައި" ކަމަށެވެ.
ހައްޖުގެ އަޅުކަން އަދާކުރެއްވުމަށް ފަހު ރައީސާއި އަނބިކަނބަލުން ފަޒުނާ އަހުމަދު ރާއްޖެ ވަޑައިގެންފައި ވަނީ މިދިޔަ ބުދަ ދުވަހުގެ ރެ އެވެ.