މާލޭގައި ޔޯގާ ދުވަސް ފާހަގަކުރަން މިދިޔަ މަހު ބޭއްވި އިވެންޓްގެ ތެރޭގައި ހަމަނުޖެހުން ހިންގި ކަމަށް ބުނެ ހައްޔަރުކޮށްފައިވާ ދެ ޝެއިހުންނަކީ އެކަމުގައި ބައިވެރިވި ބައެއް ނޫން ކަމަށް ދީނީ އިލްމުވެރިޔާ ޑރ. އަލީ ޒާހިރު ބިން ސައީދު ގާސިމް ވިދާޅުވެއްޖެ އެވެ.
މިދިޔަ މަހުގެ 21 ވަނަ ދުވަހުގެ ހެނދުނު ހިނގި ހަމަނުޖެހުންތަކާ ގުޅިގެން ޖޫން މަހުގެ 22 ގައި ހައްޔަކުރި ޝެއިހް އާދަމް ނިޝާނާއި ފަޒުލޫން މުހައްމަދު ރަޙުމްކުޑަ ގޮތަކަށް ހައްޔަރުކޮށްގެން ވާނުވާގައި ބޭތިއްބުމަކީ ގަބޫލުކުރެވޭނެ ކަމެއް ނޫން ކަމަށް ޒާހިރު ވެސް ވިދާޅުވި އެވެ.
ޔޯގާ އާ ދެކޮޅަށް އަޑުއުފުލި ދެޝެއިޚުން ހަމަނުޖެހުމުގައި ބައިވެރިވެފައި ނުވަނީސް ރަޙުމްކުޑަ ގޮތަކަށް ހައްޔަރު ކޮށްގެން ވާނުވާގަ ބައިތިއްބުން ޤަބޫލެއް ނުކުރެވޭ. ދީނީ ކަމެއްގައި ޙައްޤަކާ ނުލައި ޢިލްމުވެރިއަކަށް އަނިޔާވެރިވުމަކީ ހުރިހާ ޢިލްމުވެރިންނަށް އަނިޔާކުރުން ފަދަ ކަމެއް.
— Dr.Ali Zahir bin Saeed Gasim (@alizahirsaeed) July 20, 2022
"ދީނީ ކަމެއްގައި ހައްގަކާ ނުލައި އިލްމުވެރިއަކަށް އަނިޔާވެރިވުމަކީ ހުރިހާ އިލްމުވެރިންނަށް [ވެސް] އަނިޔާކުރުން ފަދަ ކަމެއް." އޭނާ ވިދާޅުވި އެވެ.
ޝެއިހް ނިޝާނާއި ފަޒްލޫން ހައްޔަރުކުރި ފަހުން ބަންދުގެ މުއްދަތު އެކި ފަހަރު މަތިން އިތުރުކޮށް، އެންމެ ފަހުން ދެ ބޭފުޅުންގެ ބަންދަށް އިތުރު 16 ދުވަސް ކްރިމިނަލް ކޯޓުން ޖަހައި ދިނީ މިދިޔަ އަންގާރަ ދުވަހު އެވެ. އެ ބޭފުޅުން ބޭއިންސާފުން ހައްޔަރުކޮށްފައިވާތީ ހޯމް މިނިސްޓަރު އިމްރާން އަބްދުﷲ އަށް ވަރަށް ގިނަ ދީނީ އިލްމުވެރުންނާއި ދީނީ ޖަމާއަތްތަކުގެ ފާޑުކިޔުންތައް ވެސް އަމާޒުވެފައިވެ އެވެ.
Salaf jamiyyage ilmuverinnah maaiy Allah heyo rahumaiy lahvaashi.mi khuthooraiy theri dhandivalhugai Adhaalath party ge ilmuvrinna salaf ilmuveringe medhugai arairun ufehdhumah ilmuverinnah nafurath kuraa bayaku v masahkaiy kurey,ilmuverin e furusathu nudhehvumah ilthimaas kuran.
— Imran Abdulla (@ShimranAb) July 18, 2022
ޝެއިހް ނިޝާނާއި ފަޒްލޫނަކީ ސަލަފު ޖަމިއްޔާ އަށް ނިސްބަތްވަޑައިގަންނަވާ ދެ ބޭފުޅުންނެވެ. އަދި އެ ޖަމިއްޔާ އަށް އިޝާރާތްކުރައްވައި އިމްރާން މިދިޔަ ހޯމަ ދުވަހު ކުރެއްވި ޓްވީޓެއްގައި ވަނީ ސަލަފު ޖަމިއްޔާގެ އިލްމުވެރިންނާއި އަދާލަތު ޕާޓީގެ އިލްމުވެރިންގެ މެދުގައި އަރައިރުން އުފެއްދުމަށް އިލްމުވެރިންނަށް ނަފުރަތުކުރާ ބަޔަކު މަސައްކަތްކުރާ ކަމަށެވެ.
ޔޯގާ ހަމަނުޖެހުމާ ގުޅިގެން 21 މީހަކު ހައްޔަރުކުރި ނަމަވެސް އޭގެ ތެރެއިން ހަ މީހަކު މިދިޔަ ހޯމަ ދުވަހު ދޫކޮށްލާފައިވެ އެވެ.