ގިސާސް ހިފުން ނުވަތަ މަރަށް މަރު ހިފުމުގެ ހުކުމަށް އިންކާރު ކުރުމަކީ ސީދާ ކުފުރުގެ އަމަލެއް ކަމަށް ޝެއިހް އަލީ ޒައީދު ވިދާޅުވެއްޖެ އެވެ.
މި ހަފުތާގައި ވަރަށް އަނިޔާވެރިކޮށް މާލޭގައި މީހަކު މަރާލާފައިވާތީ ރާއްޖޭގައި އިސްލާމީ ޝަރީއަތާ އެއްގޮތަށް ގިސާސް ހިފަން ޖެހޭ ކަމަށް ބައެއް ފަރާތްތަކުން އަންނަނީ ބުނަމުންނެވެ. އެގޮތުން ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދާއި ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަަލީ ސައީދުގެ އިތުރުން ރާއްޖޭގެ ވަރަށް ހިނަ ދީނީ އިލްމުވެރިންނާއި އާންމުންގެ ގިނަ ބަޔަކު މިހާރު ބުނަމުން އަންނަނޫ ރާއްޖޭގައި މީހުން މެރުން މިހާރު އާންމު ކަމަކަށްވެފައިވާތީ ގިސާސް ހިފަން ޖެހޭ ކަމަށެވެ.
ނަމަވެސް ރާއްޖޭގައި އަބަދު ވެސް ގިސާސް ހިފުމަކީ ސަރުކާރުތަކުން ސިޔާސީ ކަމެއްގެ ގޮތުގައި ދެކޭ ކަމެއް ގޮތަށް ގިނަ ބަޔަކު ދެކެ އެވެ. އަދި އެ ހުކުމަށް ރާއްޖޭގެ ބައެއް ސަރުކާރުތަކުން ފާޅުގައި އިންކާރު ވެސް ކޮށްފައިވެ އެވެ.
ގިސާސްގެ ޙުކްމަކީ އެއަށް ފާޑެއް ކިޔޭނެ އެއްޗެއް ނޫން! ފާޑުކިޔޭނީ އިންސާނުންގެ ކަންކަމާ! ގިސާސްގެ ޙުކްމަކީ ބާވައިލެއްވުނު އިލާހީ ޙުކްމެއް! މިޙުކުމް ތަންފީޒު ނުކޮށްގެން ފާފަވެރިވާއިރު، މިޙުކްމަށް އިންކާރު ކުރުމަކީ ސީދާ ކުފްރެއް! އެއަށް އިންކާރުކުރާނަމަ އެއިންކާރު ކުރާނީ ގުރްއާނަށް!
— Ali Zaid (@alizaid1000) August 8, 2022
އެހެންވެ ގިސާސާ ދެކޮޅަށް ދެކެވޭ ވާހަކަތަކަށް އިޝާރާތްކުރައްވައި ޒައިދު ކުރެއްވި ޓްވީޓެއްގައި ވިދާޅުވީ ގިސާސްގެ ހުކުމަކީ އެއަށް އެއްވެސް މީހަކަށް ފާޑެއް ކިޔޭނެ ކަމެއް ނޫން ކަމަށެވެ. އޭނާ ވިދާޅުވި ގޮތުގައި އެ ހުކުމަށް އިންކާރު ކުރުމަކީ ސީދާ ކުފުރުގެ އަމަލެކެވެ.
ރާއްޖޭގައި މީހުން މެރުން އިތުރުވަމުންދާ އިރު، މިދިޔަ ހޮނިހިރު ދުވަހުގެ ރޭ ބޮލާއި ހަތަރެސްފައި ބުރިކޮށް މަރާލީ 22 އަހަރުގެ އަންހެނެކެވެ. މިއީ މި އަހަރު ރާއްޖޭގައި މަރާލި ދެވަނަ މީހާ އެވެ. މިދިޔަ ޖޫން މަހުގެ 2 ވަނަ ދުވަހުގެ ރޭ އައްޑޫ ފޭދޫގައި ތޫނު އެއްޗެހިން ހަމަލާދީ 21 އަހަރުގެ ފިރިހެނަކު ވެސް މަރާލާފައިވެ އެވެ