އިއްޔެ ބޭއްވި ދެ ރަށެއްގެ ކައުންސިލްގެ ބައި-އިލެކްޝަންތަކެއް އެމްޑީޕީގެ ކެންޑިޑޭޓުންތަކަކަށް ކާމިޔާބުވުމަކީ އެ ޕާޓީ އަށް ލިބުނު ކާމިޔާބީއެއް ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
މ، ދިއްގަރާއި ތ. ގާދިއްފުށީ ކައުންސިލްގެ ބައި-އިލެކްޝަން ކާމިޔާބުކުރި ދެ މީހުންނަށް މަރުހަބާ ވިދާޅުވެ، ރައީސް ކުރެއްވި ޓްވީޓެއްގައި ވަނީ އެ މީހުންގެ ކެމްޕޭން ޓީމަށް ވެސް މަރުހަބާ އާއި ޝުކުރު ދަންނަވައިފަ އެވެ.
މ.ދިއްގަރު އަދި ތ.ގާދިއްފުށި ކައުންސިލުގެ ބައި އިލެކްޝަންގައި @MDPSecretariatގެ ޒުލައިޚާ އަޙްމަދާއި ޢަބުދުﷲ ޢާރިފް ހޯއްދެވި ކާމިޔާބީއަށް މަރުޙަބާ ކިޔަން. މިއީ ޕާޓީއަށް ލިބުނު މުހިންމު ކާމިޔާބީއެއް. ކެމްޕެއިނަށް އެހީތެރިވި މެންބަރުންނަށާއި ކެމްޕޭން ޓީމަށް މަރުހަބާ ދަންނަވަން. pic.twitter.com/4QMQpC6Vgp
— Ibrahim Mohamed Solih (@ibusolih) August 13, 2022
އިއްޔެ ބޭއްވި ބައި-އިލެކްޝަންގައި އެމްޑީޕީގެ ކެންޑިޑޭޓް ޒުލައިހާ އަހުމަދު ކާމިޔާބުކުރީ އިތުރު ދެ ކެންޑިޑޭޓަކާ ވާދަކުރައްވަ އެވެ. އެއީ ޕީޕީއެމާއި އެމްއާރްއެމްގެ ކެންޑިޑޭޓެވެ. އިންތިހާބުގައި ޒުލޭހާ އަށް 210 ވޯޓް ލިބުނެވެ. ޕީޕީއެމްގެ ކެންޑިޑޭޓް ހައްވާ އަބްދުލްހާދީ އަށް 201 ވޯޓް ލިބުނު އިރު، އެމްއާރްއެމްގެ ކެންޑިޑޭޓް ފާޠިމަތު މަލްދާ އަށް ލިބުނީ ހަތަރު ވޯޓެވެ.
ދިއްގަރުގެ ބައި އިލެކްޝަން އެމްޑީޕީގެ ކެންޑިޑޭޓް އަބްދުﷲ އާރިފް ކާމިޔާބުކުރީ ޕީޕީއެމްގެ ކެންޑިޑޭޓަކާ ވާދަކޮށްގެންނެވެ. އެގޮތުން އޭނަ އަށް ވަނީ 375 ވޯޓު ލިބުނު އިރު، ޕީޕީއެމްގެ ކެންޑިޑޭޓް އަބްދުލްހަންނާނަށް ލިބުނީ 325 ވޯޓެވެ.