ލިވާތު ނުވަތަ އެއްޖިންސުން ގުޅުން ހިންގާކަން ސާބިތުވެއްޖެ މީހަކަށް އިސްލާމް ދީނުގައި އޮތް ހުކުމަކީ މަރު ކަމަށް ޝެއިހް އަލީ ޒައިދު ވިދާޅުވެއްޖެ އެވެ.
ރާއްޖޭގައި މި ފަހުން ފެންމަތި މިފަދަ މައްސަލަތަކާ ގުޅިގެން ދައުވާކުރި ބައެއްގެ މީހުން ޝަރީއަތްތައް ވެސް ފަށާފައިވާ އިރު، ޒައިދު ކުރެއްވި ޓްވީޓެއްގައި ވިދާޅުވީ ދީނުގައި ވަނީ ދުނިޔެ މަތީގައި އަދަބު ލިބިއްޖެ މީހާ އަށް އާހިރަތުގައި އަމާންވާނެކަން ކަމަށެވެ.
"ކުށަކަށް ދުނިޔޭގައި އަދަބު ލިބުމަކީ އޭނަ އެ ކުށުން ތޯހިރުކޮށްދޭ ކަމެއް،" އޭނާ ވިދާޅުވި އެވެ. "އަދި [އެއީ] އެހެން މީހުންނަށް އޮތް އިބުރަތެއް."
ބަންގްލްދޭޝްގެ އެމްޑީ އަލަމްގީރް ކިޔާ ޒުވާނަކާ އެކީ ރާއްޖޭގެ ފިރިހެނުންތަކެއް އެއްޖިންސުން ގުޅުން ހިންގި މައްސަލަތަކެއް ފެންމަތިވެ، އޭނަ ހިމެނޭ ގޮތަށް މިހާތަނަށް ހަތަރު މީހަކަށް ދައުވާކޮށްފައިވެ އެވެ. އެއީ ކުރީގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރާއި މުހައްމަދު ނަޝީދު (ކާނަލް) ގެ އިތުރުން ކުރިން ފުލުހެއްގެ ގޮތުގައި މަސައްކަތްކުރި އަބްދުއްރަހްމާން ރަފީއު އެވެ.
Livaathu kurikan Saabithu vejje nama Islamee Sharia gai adhabakee Maru! Dheenugai vany dhuniyematheege adhab libijje meehaa ah Aakhirathu gai amaan vaane kamah! Kushakah dhuniyeygai adhab libumakee eynaa e kushun thoahir kohdhey kameh! Adhi ehen meehunnah huri ibratheh!
— Ali Zaid (@alizaid1000) August 30, 2022
އެ މީހުންނާ އެކީ ގުޅުން ހިންގިކަން އަލަމްގީރުގެ އިއުތިރާފާ އެކީ ސާބިތުވެފައިވާތީ އޭނަގެ މައްޗަށް އެ މައްސަލާގައި ހުކުމްކުރަން ހަމަޖެހިފައި ވަނީ މިއަދެވެ.
އެނގިފައިވާ ގޮތުގައި އެއްޖިންސުން ގުޅުން ހިންގި އެ މައްސަލައިގައި އަލަމްގީރަށް ދައުވާކުރީ ޖިންސީ ކުށްތަކަށް އަދަބު ކަނޑައަޅާ ހާއްސަ ގާނޫނު ކަމަށްވާ ޖިންސީ ކުށުގެ ގާނޫނުގެ ބަދަލުގައި ގާނޫނޫލްއުގޫބާތުގެ ދަށުންނެވެ. އެ ދެ ގާނޫނޫގައި ވެސް އެއް ޖިންސުން ގުޅުން ހިންގުމުގެ ކުށް ބަޔާންކޮށްފައިވާ އޮތަސް، އެ ދެ ގާނޫނުގެ ތެރެއިން ލުއި އަދަބެއް ލިބެނީ ގާނޫނުލްއުގޫބާތުގެ ދަށުންނެވެ.
އެގޮތުން ޖިންސީ ކުށުގެ ގާނޫނުގައި އޮންނަ ގޮތުން ދެ މީހަކު ރުހުމުގައި އެއްޖިންސުން ގުޅުން ހިންގައިފި ނަމަ، އެކަމުގެ އަދަބަކީ 5-7 އަހަރާ ދެމެދުގެ މުއްދަތަކަށް ޖަލަށްލުމެވެ. އަދި މީހަކު އެހެން މީހެއްގެ ނުރުހުމުގައި އެއްޖިންސުން ގުޅުން ހިންގައިފި ނަމަ، އެކަމުގެ އަދަބެއްގެ ގޮތުގައި އޮންނަނީ 7-10 އަހަރާ ދެމެދުގެ މުއްދަތަކަށް ޖަލަށްލުމެވެ.