ހާރިޖީ ދާއިރާ އަށް ކޮށްދެވަމުން ގެންދަވާ ހިދުމަތްތަކުގެ އަގުވަޒަންކޮށް އދ. ގެ އިންޓަނޭޝަނަލް އެސޯސިއޭޝަން އޮފް ޕާމަނަންޓް ރެޕްރަޒެންޓޭޓިވްސް (އައިއޭޕީއާރް) އިން، އެ އެސޯސިއޭޝަންގެ އޮނަރަރީ މެންބަރުކަން ފޮރިން މިނިސްޓަރު އަބްދުﷲ ޝާހިދަށް އަރުވައިފި އެވެ.
މިނިސްޓަރަށް އެ ޝަރަފް އަރުވާފައި ވަނީ އދ. ގެ އާންމު މަޖިލީހުގެ ރައީސްގެ ހައިސިއްޔަތުން ކުރައްވާފައިވާ މަސައްކަތްތަކަށާއި، ރާއްޖޭގެ ހާރިޖީ ދާއިރާއަށް ކޮށްދެއްވަމުން އަންނަ ހިދުމަތްތަކާއި، ރާއްޖެ އާއި ބޭރު ގައުމުތަކާ އެކު ގުޅުން ބަދަހިކުރައްވައި، އދ. އަށް ކޮށްދެއްވި ހިދުމަތްތައް ފާހަގަކުރުމަށް ބޭއްވި ހާއްސަ ރަސްމިއްޔާތެއްގަ އެވެ.
I was honoured to receive honorary membership of the International Association of Permanent Representatives.
Thank you dear Ambassadors for making me feel like part of the family from day one. pic.twitter.com/Yw73RCe8lA
— Abdulla Shahid (@abdulla_shahid) September 16, 2022
އައިއޭޕީއާރްގެ އޮނަރަރީ މެންބަރުކަމާއި ޝަރަފުގެ އައްޑަނަ ޝާހިދާ ހަވާލުކޮށް ދެއްވީ އައިއޭޕީއާރްގެ ރައީސް އަދި ނެމީބިޔާ އިން އދ. އަށް ކަނޑައަޅުއްވާފައިވާ ދާއިމީ މަންދޫބު، ނެވިލް މެލްވިން ގާރޓުޒެވެ،. އޭބާ ވިދާޅުވީ ޝާހިދު، އދ. އަށާއި އަމިއްލަ ގައުމަށް ކޮށްދެއްވަމުން އަންނަ މަސައްކަތްތަކަކީ ތައުރީފު ޙައްޤު މަސައްކަތްޕުޅުތަކެއް ކަމަށެވެ.
މި ޝަރަފުގެ އައްޑަނަ ދާއިމަށް ރަމްޒުކޮށް ދޭނީ ޝާހިދު އދ. ގެ 76 ވަނަ އާންމު މަޖިލީހުގެ ރައީސްގެ ހައިސިއްޔަތުން ކޮށްދެއްވި އަގުހުރި އަދި މަތިވެރި ޚިދްމަތްތައްކަމަށްވެސް އައިއޭޕީއާރްގެ ރައީސް ވިދާޅުވި އެވެ.
އައިއޭޕީއާރަކީަ 1988 ގައި އަހަރު ވުޖޫދަށް އައި އެސޯސިއޭޝަނެކެވެ. މީގެ މައިގަނޑު މަގުސަދަކީ އދގެ ދާއިމީ މަންދޫބުކަން ކުރައްވަމުން ގެންދަވާ އަދި ކުރައްވާފައިވާ ބޭފުޅުންނާއި ފޯރަމްތައް މެދުވެރިކޮށް ގުޅުން ބަދަހިކޮށް، އދ އާއި އެ ބޭފުޅުންގެ މެދުގައި މުއާސަލާތީ ގުޅުން ރަނގަޅުކޮށް، އެކިއެކި ގައުމުތަކާ ދެމެދު އޮތް ގާތް ރަޙްމަތްތެރިކަމުގެ ގުޅުން ބަދަހިކުރުމެވެ.