އެސްޓީއޯ އިން ރޭޑިއޮގްރަފީ އަށް މީހުން ތަމްރީނުކުރަން ފެށުމާ ގުޅިގެން މި ސަރުކާރަށް އާ ކަމެއް ނުކުރެވޭ ކަމަށް ވިދާޅުވެ ޕީޕީއެމްގެ ނައިބު ރައީސް އަހުމަދު ޝިޔާމް ފާޑު ވިދާޅުވެއްޖެ އެވެ.
އިއްޔެ ރޭ އެސްޓީއޯ އިން އިފުތިތާހުކުރި ޕްރޮގްރާމާ ގުޅިގެން ރައީސް އިބްރާހީމް މުހައްމަދު ސޯލިހުގެ ވެރިކަމުގައި އާ ކަމެއް ނުކުރެވޭ ކަމަށް ވިދާޅުވި ނައިފަރު ދާއިރާގެ މެމްބަރު ކުރެއްވި ޓްވީޓެއްގައި ވިދާޅުވީ އެސްޓީއޯގެ ޓްރެއިނިން ސެންޓަރަކީ 2016 ގައި އުފައްދައި، އެތަނުން ރޭޑިއޮގްރަފީ ކޯހެއް ހިންގަން އޭރު އެޑިއުކޭޝަން މިނިސްޓްރީއާ އެކީ އެމްއޯޔޫއެއްގައި ސޮއި ވެސް ކުރި ކަމަށެވެ.
އަދި އޭގެ ކުރިން 2014 ގައި އެސްޓީއޯން އޮންލައިން ފާމަސީ ކޯސްތަކެއް ވެސް ފެށި ކަމަށް ޝިޔާމް ވިދާޅުވި އެވެ.
"ހެޔޮނުވާނެ ރައީސް ސޯލިހު އާ ކަމެއްކޮށްބަލަ." ކުރީގެ ރައީސް އަބްދުﷲ ޔާމީންގެ ވެރިކަމުގައި ކުރި ފެށި ކަހަލަ ކަންކަން ނޫނީ މި ސަރުކާރަށް ނުކެރެވޭ ކަމަށް އިޝާރާތްކޮށް އޭނާ ވިދާޅުވި އެވެ.
We are privileged to be the first to commence 'Diploma in Radiography' course in collaboration with GE Healthcare. We extend our sincere congratulations to the first batch of students of this course! pic.twitter.com/S9NzP7vFPG
— STO (@stoplc) October 6, 2022
އެސްޓީއޯ އިން ހުރިހާ ހަރަދެއް ދޭ ގޮތަށް ފެށި ޑިޕްލޮމާ އިން ރޭޑިއޮގްރަފީ ކޯހުގައި ޖުމްލަ 25 ދަރިވަރަކަށް ފުރުސަތު ދީފައިވެ އެވެ. އެ ކޯހުގެ މުއްދަތަކީ ދެ އަހަރާއި ހަ މަހެވެ. މިއީ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އާއި އެލައިޑް ހެލްތު ކައުންސިލުން ގަބޫލުކުރާ އެ އިދާރާތަކުގެ ހުއްދަ ލިބިފައިވާ ކޯހެކެވެ.