ގދ. ހޯނޑެއްދޫ ވަލުތެރޭގައި ވަޅުލާފައި ހުރި ގިނަ އަދަދެއްގެ މަސްތުވާތަކެތި ހޯދާފައިވާ ކަމަށް ފުލުހުން މިއަދު ބުނެފި އެވެ.
ފުލުހުން ބުނި ގޮތުގައި، އެ ތަކެތި ހޯދާފައި ވަނީ ފުލުހުންގެ ޑްރަގު އެންފޯސްމަންޓް ޑިޕާޓްމަންޓް (ޑީއީޑީ) އާއި އިންޓެލިޖެންސް އަދި ސައުތު ޕޮލިސް ގުޅިގެން މިހާރު ކުރިއަށް ގެންދާ އޮޕަރޭޝަނެއްގެ ތެރެއިންނެވެ. އެގޮތުން މަސްތުވާތަކެތި ފެނުނީ ހޯނޑެއްދޫ ވަލުތެރޭގައި ވަޅުލާފައި ހުއްޓާ ކަމަށް ބުންޏެވެ.
މިމައްސަލައާައި ގުޅިގެން ހައްޔަރުކުރެވުނު އެހެން ފަރާތެއް ގދ. ހޯޑެއްދޫ ވަލުތެރޭގައި ވަޅުލައި ފޮރުވާފައިހުރި ގިނައަދަދެއްގެ މަސްތުވާތަކެތި ފުލުހުންގެ ޓީމުން ވަނީ ހޯދާފައި. ގދ. ހޯޑެއްދޫގެ އެހެނިހެން ތަންތަން ކުރިއަށް އޮތް ވަގުތުތަކުގައި ފުލުހުން ބަލާފާސްކުރާނެ.
— Mohamed Hameed (@M_Hameedh) October 28, 2022
ފުލުހުން ބުނީ މި އޮޕަރޭޝަން ފެށީ ރާއްޖެ އަށް މަސްތުވާތަކެތި އެތެރެކޮށް، އެ ތަކެތި ވިއްކައި ވިޔަފާރިކުރާ ކަމަށް އިންޓެލިޖެންސަށް ލިބުނު މައުލޫމާތަކާ ގުޅިގެން ކަމަށެވެ. އެކަމަކު އަތުލައިގަތީ ކިހާ އަދަދެއް އަދި ކޮން ބާވަތެއްގެ މަސްތުވާތަކެތި ކަމެއް ހާމައެއް ނުކުރެ އެވެ.
މަސްތުވާތަކެތި ރާއްޖެ އެތެރެކުރިކަމުގެ ތުހުމަތަށް ހައްޔަރުކުރެވުނު ގދ. ހޯޑެއްދޫ، ސްވެން ޢަބްދުﷲ ރަޝީދު ފުލުހުންގެ ހައްޔަރަށް ގެނެވިފައިހުއްޓާ ނިޔާވުން އެއީ ވަރަށް ހިތާމަވެރިކަމެއް. ފުލުހުންގެ އިހުމާލެއް އޮތްތޯބެލުމަށް ހިންގާ ތަހުގީގަށް ފުރިހަމަ އެއްބާރުލުން ދެވޭނެ!
— Mohamed Hameed (@M_Hameedh) October 28, 2022
މި މައްސަލަ މިހާރު އިތުރަށް ތަހުގީގުކުރަމުން އަންނަ އިރު، ކޯޓް އަމުރެއްގެ ދަށުން އިތުރު ތަންތަން ބަލައި ފާސްކުރުމުގެ މަސައްކަތް ވެސް ކުރަމުން އަންނަ ކަމަށް ފުލުހުން ބުންޏެވެ.
މި އޮޕަރޭޝަންގެ ތެރެއިން މިދިޔަ އަންގާރަ ދުވަހު ހޯނޑެއްދޫން އަބްދުﷲ ރަަޝީދު (މާޓީ) ހިމެނޭ ގޮތަށް ތިން މީހަކު މިދިޔަ އަންގާރަ ހައްޔަރުކުރި އެވެ. އަދި އެ މީހުން ގޮވައިގެން އެ ރަށުން ފުރައިގެން ގެންދަނިކޮށް މާޓީ ވަނީ ލޯންޗުމަތީގައި މަރުވެފަ އެވެ.