އަނިޔާގެ ސަބަބުން ވޯލްޑް ކަޕަށް ފްރާންސްގެ ގައުމީ ޓީމުން ނެގި ސްކޮޑުން ރެއާލް މެޑްރިޑްގެ ފޯވާޑް ކަރީމް ބެންޒެމާ ބާކީކޮށްފި އެވެ.
ބެންޒެމާގެ ފައިގެ ފަލަމަސްގަނޑަށް އަނިޔާވެފައިވަނީ ފްރާންސުން އިއްޔެ ކުރިއަށްގެންދިޔަ ފަރިތަކުރުންތަކުގެ ތެރެއިންނެވެ. އެގޮތުން އެ އަނިޔާއާ ގުޅިގެން ބެންޒެމާ ތިން ހަފްތާ އަށް ކުޅުމާ ދުރުގައި ހުންނަންޖެހޭނެ ކަމަށް ފްރާންސްގެ ފުޓްބޯޅަ އިދާރާ އިން ބުނެ އެވެ.
ބެންޒެމާގެ ބަދަލުގައި ސްކޮޑަށް ކުޅުންތެރިއަކު ނެގުމުގެ ފުރުސަތު މާދަމާގެ ނިޔަލަށް ފްރާންސަށް އޮންނާނެ އެވެ.
Karim @Benzema has pulled out of the World Cup with a thigh injury.
The whole team shares Karim's disappointment and wishes him a speedy recovery💙#FiersdetreBleus pic.twitter.com/fclx9pFkGz
— French Team ⭐⭐ (@FrenchTeam) November 19, 2022
ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބެލޮންޑިއޯ އެވޯޑް މިފަހަރު ހާސިލުކުރި ބެންޒެމާ އަކީ ޔޫރަޕްގައި މިވަގުތު ހުރި އެންމެ މޮޅު އެއް ފޯވާޑެވެ.
ބެންޒެމާ އަކީ ފްރާންސްގެ ސްކޮޑަށް ނެގިފަހުން އަނިޔާގެ ސަބަބުން ބާކީ ކުރަން ޖެހުނު ތިންވަނަ ކުޅުންތެރިޔާ އެވެ. މީގެކުރިން އަނިޔާގެ ސަބަބުން ޕީއެސްޖީ އަށް ކުޅެމުން އަންނަ ފްރާންސްގެ ޑިފެންޑަރު ޕްރެސްނަލް ކިމްޕެމްބޭ އާއި އާރްބީ ލައިޕްޒިގަށް ކުޅެމުން އަންނަ ފްރާންސްގެ ވިންގް، ކްރިސްޓޮފާ އެންކުންކޫ ވެސް ވަނީ ސްކޮޑުން ބާކީކޮށްފަ އެވެ.
ފްރާންސަކީ ވޯލްޑް ކަޕްގެ އެންމެފަހުގެ ޗެމްޕިއަނުން ކަމަށްވާއިރު އަނިޔާގެ ހިޔަނި އެޓީމަށް ވަނީ ވަރަށް ބޮޑަށް އެޅިފަ އެވެ. އެގޮތުން މިފަހަރުގެ ވޯލްޑް ކަޕުން ފްރާންސްގެ މުހިއްމު ދެ ކުޅުންތެރިން ކަމަށްވާ އެންގޯލޯ ކަންޓޭ އަދި ޕޯލް ޕޮގްބާ ވެސް ނުފެންނާނެ އެވެ.
ވޯލްޑް ކަޕްގައި ފްރާންސް މިފަހަރު ލައްވާލާފައިވަނީ އޮސްޓްރޭލިއާ، ޑެންމާކް އަދި ޓިއުނީޝިޔާއާއެކު ގްރޫޕް ޑީ ގަ އެވެ. މުބާރާތުގެ ފުރަތަމަ މެޗުގައި މި މަހުގެ 23 ވަނަ ދުވަހު ފްރާންސް ބައްދަލުކުރާނީ އޮސްޓްރޭލިޔާއާ އެވެ.