މި މަހުގެ 19 ވަނަ ދުވަހު ފެށުމަށް ހަމަޖެހިފައިވާ އޭއެފްސީ ޗެލެެންޖް ކަޕް ފެށެން ދެން ކޮންމެ ދުވަހަކުވެސް ޗެލެންޖް ކަޕާއި ގުޅޭ ކޮންމެވެސް ހަރަކާތެއް އައްޑޫގައި ކުރިއަށްދާނެ ކަމަށް އެފްއޭއެމްގެ ޑައިރެކްޓާ އޮފް އެޓޯލްސް ފުޓްބޯލް އަހްމަދު މުޖްތަބާ (ފެސްކޯ) ވިދާޅުވެއްޖެއެވެ.
ފޯރިގަދަ ކުރުމުގެ ގޮތުން ޗެލެންޖް ކަޕްގެ ޓްރޮފީ އައްޑޫއަށް ގެނެސް މިއަދު ހަވީރު ބޭއްވި ވެހިކަލް ބުރައްފަހު ނޫސްވެރިންނާއި ވާހަކަ ދައްކަވަމުން ފެސްކޯ ވިދާޅުވީ މީ އައްޑޫގައި ޗެލެންޖް ކަޕް ފޯރި ނެގުމުގެ ފެށުން ކަމަށެވެ. އަދި މުބާރާތް ފެށެން ދެން ކޮންމެ ދުވަހަކުވެސް ކޮންމެވެސް ހަރަކާތެއް ކުރިއަށްދާނެކަމަށެވެ.
ފެސްކޯ ވިދާޅުވީ މިމަހުގެ 10 ވަނަ ދުވަހު އެމްއެންޑީއެފް އާއި ގުޅިގެން ހުޅުމީދޫގައި ހާއްސަ ކުޑަކުދިންގެ ހަވީރެއް ބޭއްވުމަށް މަސައްކަތް ކުރަމުން އަންނަ ކަމަށެވެ.
މުބާރާތުގެ ޓްރޮފީ އާއި އެކު މިއަދު ބޭއްވި ވެހިކަލް ބުރު ފެށުނީ ފޭދޫ ބޯޅަ ދަނޑު "ދޮންދީނާ" މޮނިއުމެންޓް ހިސާބުންނެވެ. އަދި ބުރު ނިންމާލާފައިވަނީ ހިތަދޫ އީސީސީއަށެވެ.
އީސީސީ ސަރަހައްދުގައި ޓްރޮފީ އާއި އެކު އާއްމުން ފޮޓޯ ނެގުމަށް ވަނީ ފުރުސަތު ދީފައެވެ.
މިއަދުގެ ހަރަކާތުގައި އެންވައިރަމެންޓް މިނިސްޓަރ ޑރ. ޠޯރިގް އާއި އައްޑޫގެ މޭޔަރ އަބްދުﷲ ސޯދިގް (ސޯބެ) އާއި ކައުންސިލްގެ އިތުރު މެމްބަރުންގެ އިތުރުން އައްޑޫގެ ގިނަ ޒުވާނުންތަކެއް ވަނީ ބައިވެރިވެފައެވެ.