ވޯލްޑް ކަޕްގެ ދެވަނަ ބުރުގައި ޕޯޗުގަލްއާ ދެކޮޅަށް ކުޅުނު މެޗަށް ތައްޔާރުވުމުގެ ތެރޭގައި ސްވިޒަލޭންޑްގެ ބައެއް ކުޅުންތެރިން ބަލިވި ކަމަށް އެ ޓީމުގެ ކޯޗު މުރާތް ޔަކިން ބުނެފި އެވެ.
ދެވަނަ ބުރުގައި ރޭ ޕޯޗުގަލްއާ ދެކޮޅަށް ކުޅުނު މެޗުން ސްވިޒަލޭންޑް ވަނީ 6-1 ގެ ތަފާތު ބޮޑު ނަތީޖާއަކުން ބަލިވެފަ އެވެ. މިއީ މުބާރާތުގެ ދެވަނަ ބުރުން ސްވިޒަލޭންޑް ޖެހިޖެހިގެން ކެޓި ތިންވަނަ ފަހަރެވެ.
We're back underway!
Switzerland have 45 minutes to rescue their World Cup dream #POR #SUI
— FIFA World Cup (@FIFAWorldCup) December 6, 2022
ރޭގެ މެޗަށްފަހު ވާހަކަދައްކަމުން ޔަކިން ބުނީ މެޗަށް ތައްޔާރުވުމުގެ ތެރޭގައި ޓީމުގެ ތިން ޑިފެންޑަރުން ކަމަށްވާ ސިލްވަން ވިޑްމާ އާއި ފަބިއަން ޝާގެ އިތުރުން ނިކޯ އެލްވެޑީ އުޅުނީ ބަލިވެ ކަމަށެވެ. އެގޮތުން ވިޑްމާ އާއި ޝާ އަށް ރޯގާގެ އަސަރު ކުރިއިރު އެލްވެޑީ އަށް ހުމުގެ އަސަރު ކުރި ކަމަށް ޔަކިން ބުންޏެވެ.
މި ތިން ކުޅުންތެރިންގެ ތެރެއިން ރޭގެ މެޗުގައި ކުޅުނީ ފަބިން ޝާ އެކަންޏެވެ. ނަމަވެސް ފުރަތަމަ ހާފަށްފަހު އޭނާ ވަނީ ބަދަލުކޮށްފަ އެވެ.
ސްވިސް ކޯޗު ވަނީ މެޗުން ބަލިވީ އެ ސަބަބާއި ހުރެ ނޫން ކަމަށާއި ބަލި ގަބޫލުކޮށް ޕޯޗުގަލް އަށް މަރުހަބާ ކިޔާ ކަމަށް ބުނެފަ އެވެ. މެޗުން ބަލިވުމުން ހުރިހާ ކަމަކަށް ފާޑުކިޔަން ބޭނުން ނުވާ ކަމަށާއި ޓީމުން ރަނގަޅު ހިތްވަރެއް ދެއްކި ކަމަށް ކޯޗު ބުންޏެވެ. ނަމަވެސް މެޗުގެ ނަތީޖާ އާއި މެޗުން ބަލިވި ގޮތާއި މެދު ހިތާމަކުރާ ކަމަށް އޭނާ ވަނީ ބުނެފަ އެވެ.